Andijonda xalq deputatlari mahalliy Kengashlarining axborot maydonidagi faoliyati kuchaytirilmoqda

2026 yil 25 mart kuni Xalq deputatlari Andijon shahar Kengashida “Mahalliy Kengashlarning ijtimoiy tarmoqlardagi faoliyatini samarali tashkil etish” mavzusida seminar boʻlib oʻtdi.

Seminar Xalq deputatlari Andijon viloyati Kengashi kotibiyati hamda Demokratik jarayonlarni tahlil qilish markazi Andijon viloyati hududiy boʻlinmasi hamkorligida tashkil etildi.

Unda xalq deputatlari viloyat, tuman va shahar Kengashlari kotibiyatlari xodimlari hamda mahalliy OAV vakillari ishtirok etdilar.

Tadbirdan koʻzlangan asosiy maqsad – mahalliy Kengashlarning ijtimoiy tarmoqlardagi faoliyatini tizimli yoʻlga qoʻyish orqali davlat boshqaruvida ochiqlik va shaffoflikni taʼminlash, deputatlar va xalq oʻrtasidagi muloqotni kuchaytirish hamda amalga oshirilayotgan islohotlarni keng yoritish orqali fuqarolarning vakillik organlariga boʻlgan ishonchini mustahkamlashdan iborat boʻldi.