Deputatlik nazorati aholi manfaatini ta’minlashda muhim omil 

 Xalq deputatlari Ohangaron tumani Kengashiga “Quyun”
okrugidan saylangan deputat Abbos Mirzavaliev tomonidan tuman Kengashi mutasaddilari
bilan hamkorlikda Olmaliq–Quyun mahallasi yo‘nalishidagi jamoat transporti xizmati
holatini o‘rganish maqsadida deputatlik nazorati o‘tkazildi. 

O‘rganish jarayonida aholiga ko‘rsatilayotgan transport xizmati sifatini oshirishga qaratilgan bir qator muhim jihatlar tahlil
qilindi. Jumladan, jamoat transportining muntazam harakatlanishi, yo‘nalishdagi
avtobus bekatlarining holati, shuningdek, chiptalarni olish jarayonining qulayligi
atroflicha ko‘rib chiqildi. 

Ma’lum bo‘lishicha, mazkur yo‘nalishda aholiga jamoat transporti xizmati “Mustang” mas’uliyati cheklangan jamiyati tomonidan
amalga oshirilib, tasdiqlangan jadval asosida 20 ta “damas” rusumli avtomashinalar
qatnovni ta’minlab kelmoqda. Umuman olganda, transport vositalarining muntazam harakati
ta’minlanayotgani qayd etildi. 

Shu bilan birga, yo‘nalishdagi avtobus bekatlaridan biri ta’mirtalab ahvolga kelib qolgani aniqlandi. Bu holat aholiga
noqulaylik tug‘dirayotganini inobatga olgan holda, deputat Abbos Mirzavaliev tashabbusi
bilan mazkur bekat o‘rnida yangi, zamonaviy bekat qurish ishlari boshlab yuborildi. 

Ayni paytda qurilish ishlari jadal sur’atlarda olib borilmoqda. Yangi bekat foydalanishga topshirilgandan so‘ng, yo‘lovchilar uchun
yanada qulay va xavfsiz sharoit yaratilishi kutilmoqda. 

Mazkur deputatlik nazorati aholining kundalik hayotida muhim o‘rin tutgan jamoat transporti xizmatini yaxshilashga qaratilgan
amaliy ishlardan biri bo‘ldi. Eng muhimi, bunday tashabbuslar orqali fuqarolarning
murojaatlari o‘z vaqtida o‘rganilib, muammolarga yechim topilmoqda..