Xalq deputatlari tuman Kengashi kotibiyati mudiri M. Qoraboyeva, deputat Gulchehra Sobirova hamda O‘zbekiston “Adolat” SDP Toshloq tuman Kengashi raisi G‘ayratjon Yuldashevlar Istiqlol mahalla fuqarolar yig‘inida bo‘lib, hokim yordamchisi tomonidan amalga oshirilayotgan ishlar samaradorligi, xususan aholini kambag‘allikdan chiqarish borasida olib borilayotgan ishlar holatini o‘rgandilar.

O‘rganishlar davomida mahallada fuqarolarni tadbirkorlikka jalb etish, ularning bandligini ta’minlash va daromad manbalarini yaratish bo‘yicha amalga oshirilayotgan ishlar ko‘zdan kechirildi.

Jumladan, fuqaro U. Tolipova hozirda rasmiy ish bilan band emas, turmush o‘rtog‘i esa Rossiya Federatsiyasida mehnat faoliyati bilan shug‘ullanadi. Hokim yordamchisining ko‘magi bilan oilada qoramolchilik orqali daromad topish tashabbusi qo‘llab-quvvatlanib, 100 mln so‘m kredit mablag‘i hisobiga 2 bosh zotdor qoramol olib berildi. Hozirgi kunda ushbu qoramollar parvarish qilinib, kuniga o‘rtacha 45 litr sut sog‘ilmoqda. Natijada oila daromadi sezilarli darajada oshgan.

Shuningdek, issiqxona tashkil etish istagini bildirgan fuqaro R. Usmanovga ham jami 30 mln so‘mlik kredit mablag‘i ajratilib, u gulchilik yo‘nalishida o‘z tadbirkorlik faoliyatini yo‘lga qo‘ydi. Joriy yilning yanvar oyida yetishtirilgan dastlabki gullarni sotish orqali ilk daromadiga ham ega bo‘ldi.

Istiqlol mahallasida hokim yordamchisi mahalla yettiligi bilan hamkorlikda Mahallada tadbirkorlikni rivojlantirish, aholining tadbirkorlik tashabbuslarini qo‘llab-quvvatlash maqsadida kredit va subsidiyalar ajratilishida ko‘maklashish borasida tizimli ishlar amalga oshirilmoqda .