Xalq deputatlari tuman Kengashi deputati J. Shermatov, tuman Kengashi kotibiyati bosh mutaxassisi Sh. Xo‘jamberdiyev hamda O‘zbekiston Liberal-demokratik partiyasi tuman Kengashi apparat rahbari A. O‘rmonovalar tomonidan So‘filar mahalla fuqarolar yig‘inida mahalladagi xotin-qizlarni tadbirkorlik, kasanachilik va hunarmandchilik faoliyatiga jalb etish borasida amalga oshirilayotgan ishlar joyiga chiqqan holda o‘rganildi.

Xususan, mahalla hududida istiqomat qiluvchi Z. Umarova o‘z xonadonida kasanachilik yo‘nalishida milliy liboslar tikish faoliyatini yo‘lga qo‘ygan. Hozirgi kunda ushbu faoliyat orqali 10 nafardan ortiq xotin-qizlar ish bilan ta’minlanib, o‘z daromad manbalariga ega bo‘lib kelmoqda.

Ular tomonidan mahalliy hamda chet eldan buyurtma asosida keltirilayotgan xom-ashyolar asosida tayyorlanayotgan milliy liboslar xaridorlar orasida katta qiziqish uyg‘otmoqda. Ayniqsa, yurtimizga tashrif buyurayotgan sayyohlar tomonidan ushbu mahsulotlar katta mamnuniyat bilan xarid qilinmoqda.

O‘rganish jarayonida bunday tashabbuskor xotin-qizlarni qo‘llab-quvvatlash, kasanachilik faoliyatini yanada kengaytirish hamda ko‘proq xotin-qizlarni bandlikka jalb etish muhimligi ta’kidlandi.