Xalq deputatlari Ishtixon tumani Kengashining navbatdagi sessiyasida tuman hokimligi Qurilish va uy-joy kommunal xo‘jaligi bo‘limi boshlig‘i A.Ruziqulovning uy-joy qurilishi sohasini rivojlantirish, ulush kiritish asosida qurilish jarayonlarini tartibga solish borasida amalga oshirilgan ishlar yuzasidan hisoboti eshitildi.

Hisobotda qayd etilishicha, 2025-yilda tumanda aholini uy-joy bilan ta’minlash maqsadida Xalqobod MFY hududida 3 ta 60 xonadonli hamda Qoraqo‘yli MFYda 1 ta 40 xonadonli ko‘p kvartirali uylar qurilib, foydalanishga topshirilgan.

Shuningdek, Ko‘tarma MFY hududida 9 ta 180 xonadonli uy-joy qurilishi boshlangan bo‘lib, ularni joriy yilning sentabr oyida foydalanishga topshirish rejalashtirilgan.

Bundan tashqari, tuman master-rejasiga muvofiq yirik loyihalar amalga oshirilmoqda. Jumladan, J.Maxmudov MFY hududida 1991-yilgacha qurilgan 5 ta uy (85 xonadon) o‘rnida renovatsiya asosida 9 ta 284 xonadonli zamonaviy uy-joylar barpo etilishi rejalashtirilgan.

Ishtixon MFY hududida sohil bo‘yida 8 ta ko‘p qavatli uyda jami 476 xonadonga mo‘ljallangan zamonaviy turar-joylar qurilishi ko‘zda tutilgan.

Shuningdek, Qoraqo‘yli MFYda 3 ta 120 xonadonli, 7 qavatli uy-joylar qurilishi boshlangan bo‘lib, ularni belgilangan muddatlarda foydalanishga topshirish rejalashtirilgan.

Sessiyada uy-joy qurilishi sohasida investitsiyalarni keng jalb etish, qurilish jarayonlarini shaffof tashkil etish hamda fuqarolarning huquq va qonuniy manfaatlarini ta’minlash yuzasidan tegishli vazifalar belgilab olindi.

Kun tartibidagi masala yuzasidan deputatlar tomonidan tegishli qaror qabul qilindi.