Xalq deputatlari Ishtixon tuman Kengashi deputati O.Sadullayev tomonidan o‘z saylov okrugidagi 8-sonli umumiy o‘rta ta’lim maktabida sport infratuzilmasi holati o‘rganildi.

O‘rganish jarayonida maktabdagi sport zallari faoliyati, ularning o‘quvchilar uchun yaratilgan sharoitlari hamda mavjud sport anjomlarining holati atroflicha ko‘zdan kechirildi. Xususan, sport zallarining texnik holati, xavfsizlik talablari, jihozlarning yetarliligi va ularning amalda foydalanish darajasi tahlil qilindi.

Shuningdek, o‘quvchilarning jismoniy tarbiya darslari va darsdan tashqari mashg‘ulotlarda sport infratuzilmasidan foydalanish imkoniyatlari o‘rganilib, bu boradagi mavjud sharoitlar yuzasidan fikr almashildi.

O‘rganish davomida sport zallarini zamonaviy talablarga mos ravishda jihozlash, mavjud anjomlarni yangilash va ularning samarali foydalanilishini ta’minlash muhimligi ta’kidlandi. Bu esa o‘quvchilarning sportga bo‘lgan qiziqishini oshirish, ularning jismoniy rivojlanishini qo‘llab-quvvatlashda muhim omil bo‘lib xizmat qiladi.

Bugungi kunda ta’lim muassasalarida sport infratuzilmasini rivojlantirish — sog‘lom avlodni tarbiyalashning muhim yo‘nalishlaridan biri hisoblanadi. Shu bois bu kabi o‘rganishlar orqali mavjud holat tahlil qilinib, uni yanada takomillashtirish bo‘yicha aniq takliflar ishlab chiqilmoqda.