Sessiya kun tartibida tumanning ijtimoiy-iqtisodiy rivojlanishi hamda dolzarb masalalarga oid qator muhim yo‘nalishlar ko‘rib chiqildi. Jumladan, tumanda jinoyatchilik ahvoli va 2026-yilning birinchi choragi davomida amalga oshirilgan ishlar yuzasidan tuman prokurorining axboroti eshitildi.

Shuningdek, mahalliy budjetlarning qo‘shimcha manbalarini aniqlash va ulardan samarali foydalanishni takomillashtirish, tuman Kengashi doimiy komissiyalari tarkibiga o‘zgartirishlar kiritish masalalari muhokama qilindi. Jismoniy va yuridik shaxslarning murojaatlari bilan ishlash holati hamda ijro intizomiga rioya etilishi tahlil qilindi.

Sessiyada narx-navoning sun’iy oshishining oldini olish, sifatsiz mahsulotlarga qarshi jamoatchilik nazoratini kuchaytirish, shuningdek ijtimoiy xizmatlar tizimini takomillashtirish yuzasidan olib borilgan nazorat-tahlil ishlari natijalari ham ko‘rib chiqildi.

Bundan tashqari, ijtimoiy himoyaga muhtoj oilalar xonadonlarini ta’mirlash orqali energiya samaradorligini oshirish loyihasini moliyalashtirish hamda tashabbusli budjet jarayonlari ijrosi bilan bog‘liq masalalar yuzasidan tegishli qarorlar qabul qilindi.

Sessiya yakunida kun tartibidagi barcha masalalar bo‘yicha tegishli qarorlar tasdiqlandi. Mazkur sessiya hududni barqaror rivojlantirish, aholi murojaatlariga yechim topish hamda ochiq va samarali boshqaruvni ta’minlashda muhim ahamiyat kasb etadi.