Haftaning har payshanba kuni yurtimizda yoshlar bilan ishlash tizimini mustahkamlash, ularning muammolarini o‘rganish hamda tashabbuslarini qo‘llab-quvvatlashga qaratilgan uchrashuvlar tashkil etib kelinmoqda. Bu amaliyot yoshlar bilan bevosita muloqotni yo‘lga qo‘yish, ularning bandligini ta’minlash va ijtimoiy faolligini oshirishda muhim ahamiyat kasb etmoqda. Shu munosabat bilan Xalq deputatlari Zarbdor tuman Kengashi deputati, O‘zbekiston Mahallalar uyushmasi Zarbdor tuman bo‘limi boshlig‘i T.Qodirov tomonidan saylov okrugida istiqomat qiluvchi yoshlar va ularning ota-onalari bilan uchrashuv o‘tkazildi. Unda mutasaddi tashkilotlar vakillari ham ishtirok etdi. Muloqot davomida yoshlarning ta’lim jarayoni, kasb-hunar egallashi, bandlik masalalari hamda kelgusidagi rejalari yuzasidan fikr almashildi. Shuningdek, ularni qiynayotgan muammolar tinglanib, har bir murojaatni hal etish bo‘yicha aniq vazifalar belgilandi. Yoshlarni qo‘llab-quvvatlash, ularni kasbga yo‘naltirish va ijtimoiy himoyasini kuchaytirish masalalariga alohida e’tibor qaratildi. Bunday ochiq muloqotlar yoshlarning muammolarini o‘z vaqtida bartaraf etish, ularning tashabbuslarini qo‘llab-quvvatlash hamda kelajakka bo‘lgan ishonchini mustahkamlashga xizmat qiladi.