O‘zbekiston Respublikasi Prezidenti Sh.Mirziyoyev Ko‘ksaroy qarorgohida mamlakatimiz yoshlari bilan ochiq muloqot o‘tkazdi. Uchrashuvda turli sohalarda faoliyat yuritayotgan, ta’lim, tadbirkorlik, innovatsiya, madaniyat va sport yo‘nalishlarida yutuqlarga erishgan yigit-qizlar ishtirok etdi.

Muloqot davomida davlatimiz rahbari yoshlarning orzu-intilishlari, tashabbus va g‘oyalarini qo‘llab-quvvatlash davlat siyosatining ustuvor yo‘nalishi ekanini ta’kidladi. So‘nggi yillarda ta’lim tizimini isloh qilish, oliy o‘quv yurtlari sonini oshirish, xorijiy universitetlar filiallarini ochish hamda yoshlar tadbirkorligini rivojlantirish borasida amalga oshirilayotgan ishlar xususida fikr yuritildi.

Uchrashuvda yoshlar tomonidan startap loyihalarni moliyalashtirish, zamonaviy kasb-hunarlarni egallash uchun qo‘shimcha imkoniyatlar yaratish, axborot texnologiyalari sohasini yanada rivojlantirish bo‘yicha takliflar bildirildi. 

Shuningdek, mamlakatimizda “Yoshlar daftari” orqali ijtimoiy himoyaga muhtoj yigit-qizlarga amaliy yordam ko‘rsatilayotgani, ularni bandlik bilan ta’minlash va tadbirkorlikka jalb etish bo‘yicha tizimli ishlar olib borilayotgani qayd etildi.

Davlat rahbari yurt taraqqiyoti, Yangi O‘zbekistonni barpo etish jarayonida yoshlarning o‘rni va mas’uliyati beqiyos ekanini ta’kidlab, ularni bilimli, tashabbuskor va vatanparvar bo‘lishga chaqirdi.

Darhaqiqat, bugungi kunda O‘zbekiston taraqqiyotining yangi bosqichida — “Yangi O‘zbekiston”ni barpo etish jarayonida yoshlar hal qiluvchi kuch sifatida namoyon bo‘lmoqda. Aholining katta qismini tashkil etuvchi yoshlar mamlakatning ijtimoiy-siyosiy, iqtisodiy va madaniy hayotida faol ishtirok etib, islohotlarning asosiy harakatlantiruvchi omiliga aylanmoqda.

Yangi O‘zbekiston g‘oyasining mazmun-mohiyati inson qadrini yuksaltirish, qonun ustuvorligini ta’minlash va fuqarolik jamiyatini rivojlantirishdan iborat.      Bu jarayonda yoshlarning ijtimoiy mas’uliyati, avvalo, bilim olishga intilish, zamonaviy kasb-hunarlarni egallash, yuksak ma’naviyat va vatanparvarlik tuyg‘usi bilan yashashda namoyon bo‘ladi.

Jumladan, Sh.Mirziyoyev tomonidan ilgari surilgan tashabbuslar yoshlarni qo‘llab-quvvatlash, ularning salohiyatini ro‘yobga chiqarishga qaratilgani bilan ahamiyatlidir. Ta’lim tizimidagi islohotlar, yangi oliy ta’lim muassasalarining tashkil etilishi, xorijiy universitetlar filiallarining ochilishi yoshlar uchun keng imkoniyatlar yaratmoqda.

Yoshlarga berilayotgan imkoniyatlar bilan birga ular zimmasiga mas’uliyat ham yuklanayotganini yoshlarimiz ham his qilishlari lozim. Bu jamiyat oldidagi burch va vazifalarni anglash, qonunlarga hurmat bilan qarash, atrof-muhitga ehtiyotkor munosabatda bo‘lish va boshqalar manfaatini inobatga olish demakdir. 

Ayniqsa, axborot texnologiyalari asrida yoshlarning raqamli madaniyati va media savodxonligi muhim ahamiyat kasb etadi. Turli yot g‘oyalar va axborot xurujlariga qarshi turish, milliy qadriyatlarni asrab-avaylash ham ijtimoiy mas’uliyatning ajralmas qismi hisoblanadi.

Yoshlar o‘z fikrini erkin bildirishi, tashabbus ko‘rsatishi va jamoatchilik nazoratida ishtirok etishi orqali mamlakatda ochiqlik va shaffoflik muhitini mustahkamlaydi. Bu esa fuqarolik jamiyati institutlarining rivojlanishiga xizmat qiladi.

Xulosa qilib aytganda, Yangi O‘zbekistonni barpo etish jarayonida yoshlarning ijtimoiy va fuqarolik mas’uliyati beqiyos ahamiyatga ega. Yuksak bilimli, keng dunyoqarashli, vatanparvar va faol yoshlar — mamlakat kelajagining kafolatidir. Shu bois, har bir yosh o‘z oldiga aniq maqsad qo‘yib, jamiyat taraqqiyoti yo‘lida fidoyilik bilan mehnat qilsa, Yangi O‘zbekiston poydevori yanada mustahkamlanadi.

 Nigora USMONOVA Xalq deputatlari Jizzax shahar Kengashi deputati