Xalq deputatlari Angor tumani Kengashi deputati Raximqulov Jamshid Yo‘ldoshovich navbatdagi o‘rganish ishlari doirasida saylov okrugida joylashgan 6-sonli davlat maktabgacha ta’lim tashkilotiga tashrif buyurdi. Tashrif jarayonida muassasaning kundalik faoliyati, bolalar tarbiyasi va ta’lim jarayonining tashkil etilishi, shuningdek, tarbiyalanuvchilar uchun yaratilgan sharoitlar atroflicha ko‘zdan kechirildi. 🟦Deputat, avvalo, bolalarning sog‘lom ovqatlanishi masalasiga alohida e’tibor qaratib, oshxona faoliyati, ovqat tayyorlash jarayoni hamda tasdiqlangan menyuga amal qilinayotganini o‘rgandi. Shu bilan birga, bog‘cha hududida sanitariya holati, xonalar tozaligi, gigiyenik talablarning bajarilishi va bolalar salomatligi uchun zarur shart-sharoitlar mavjudligi ham tahlil qilindi. Tarbiyalanuvchilar mashg‘ulot o‘tayotgan xonalar, o‘yinchoqlar va o‘quv jihozlarining holati, shuningdek, ochiq havodagi sayr maydonchasi va xavfsizlik masalalari yuzasidan ham muassasa rahbariyati bilan suhbatlashildi. O‘rganish yakunida mavjud yutuqlar bilan bir qatorda, ayrim yo‘nalishlarda yanada takomillashtirish zarurligi ta’kidlanib, mas’ullar bilan hamkorlikda tegishli chora-tadbirlar belgilandi.