ЭЗГУ ТАШАББУС — ОИЛАГА МАДАД
Янгиқўрғон тумани “Баркамол” маҳалласи, Ўрикзор кўчасида яшовчи Атабаева Жамила ҳаёт синовларига қарамасдан, меҳнат ва сабр билан рўзғор тебратиб келмоқда.
2019 йилда турмуш ўртоғи кутилмаган касаллик сабаб вафот этгач, у 3 нафар вояга етмаган фарзандини бағрига олиб, ўзи 2-гуруҳ ногирони бўлишига қарамасдан, қандолат маҳсулотлари тайёрлашни ўрганди. Бугунги кунда маҳалладошлар, қариндош-уруғлар ва юртдошлар буюртмаси асосида тўй ҳамда маросимлар учун турли ширинликлар тайёрлаб, оиласини таъминлаб келмоқда.

Атабаева Жамиланинг яшаш шароити билан танишган Халқ депутатлари Янгиқўрғон туман Кенгаши депутати Тошпўлатов Олимжон Йўлдошевич унинг оиласига амалий ёрдам кўрсатди.
✅ Хонадонни таъмирлаш билан бирга, қандолат маҳсулотлари ишлаб чиқаришни кенгайтириш мақсадида хамир қориш аппарати ҳамда замонавий газ плитаси тақдим этилди.
Бу каби эзгу ишлар эҳтиёжманд оилаларни қўллаб-қувватлаш, уларнинг меҳнат қилиш имкониятини кенгайтириш ва доимий даромад манбаини шакллантиришда муҳим аҳамият касб этади.