Xalq deputatlari Qo‘qon shahar Kengashi deputati B.Usmanov tomonidan fuqaro murojaati asosida tegishli mutasaddi tashkilotga deputatlik so‘rovi yuborildi.

Deputatlik so‘rovida “To‘xlimergan” mahalla fuqarolar yig‘inining Bog‘chachilik ko‘chasi 33-uyida istiqomat qiluvchi fuqaro Sh.Yusupovaning uy-joyini ta’mirlash masalasi ko‘tarilgan.

O‘rganish davomida mazkur xonadonni ta’mirlash ishlari “Saxovat va ko‘mak” jamg‘armasi mablag‘lari hisobidan amalga oshirilishi belgilanganligi hamda tegishli tizimga kiritilgani aniqlangan. Biroq, mas’ul tashkilotlar tomonidan amaliy ishlar hali boshlanmaganligi qayd etilgan.

Shu munosabat bilan deputat tomonidan Qo‘qon shahar Obodonlashtirish boshqarmasiga rasmiy deputatlik so‘rovi yuborilib, ta’mirlash ishlarining nega kechikayotgani sabablarini aniqlash hamda muammoni ijobiy hal etish yuzasidan tegishli choralar ko‘rish so‘ralgan.

Ta’kidlanganidek, ehtiyojmand oilalarga ajratilgan mablag‘larning manzilli sarflanishi, fuqarolarga ko‘rsatilayotgan yordamlarning o‘z vaqtida yetib borishi hamda mas’ul tashkilotlar faoliyati deputatlik nazoratida bo‘lib qoladi.

Mazkur masala deputat tomonidan alohida nazoratga olingan bo‘lib, uning ijrosi yuzasidan jamoatchilikka qo‘shimcha ma’lumotlar berib boriladi.

Xalq deputatlari Qo‘qon shahar Kengashi