Qaraqalpaqstan Respublikası Joqarǵı Keńesiniń Baslıǵı
Amanbay Orınbaev basshılıǵındaǵı juwapker basshılar hám elimiz
isbilermenlerinen ibarat Qaraqalpaqstan delegaciyası Prezidentimiz tapsırması
tiykarında ámeliy sapar menen Awǵanstan Islam Ámirligine bardı. 

Sapar sheńberinde Ózbekstan-Awǵanstan arasındaǵı
baylanıs bekkemlenip atırǵanı, sonday-aq, ekonomikalıq baylanıslardı
rawajlandırıw, investiciyalıq joybarlar ústinde birge islew máseleleri
talqılandı. 

Qaraqalpaqstan ónimlerin Awǵanstanda satıwdı jolǵa
qoyıw hám bul regionımız ushın jańa bazar ekenligine ayrıqsha itibar qaratıldı.
 

Bunnan soń eki tárep isbilermen ortalıqları arasında
biznes-forum ótkerilip, onda bir qatar áhmiyetli baǵdarlar boyınsha ámeliy
birge islesiw joybarların ámelge asırıw, jaqın sheriklik qatnasıqların elede
bekkemlew máseleleri kórip shıǵıldı. 

Bunnan tısqarı, Qaraqalpaqstan hám Awǵanstannıń
regionları arasında baylanıslardı keńeytiw, bar bolǵan potencialdan nátiyjeli
paydalanıw kerek ekenligi ayrıqsha tilge alındı. 

Ushırasıwlar dawamında túrli jónelislerdi qamtıp alǵan
ulıwma bahası 340 million dollardan artıq 31 kelisimge, sonıń ishinde 27
eksport, 4 investiciyalıq kelisimlerge erisildi. 

Sonı ayrıqsha aytıw kerek, ushırasıwlarda jaqın sheriklik
múnásibetileriniń bekkemleniwi hár eki tárep ushın da áhmiyetli, sonıń menen
birge, paydalı bolatuǵınlıǵı ayrıqsha atap ótildi. 

Usı áhmiyetli ushırasıwlar nátiyjesinde Kegeyli rayonı
«Júzimbaǵ» APJ aymaǵında ándijanlı isbilermenler tárepinen shólkemlestirilgen
«Kegeyli baraka naslli parranda» jeke menshik kárxanasında jetistirilgen 50 mıń
bas 1 kúnlik shójeler Awǵanstan Respublikasına eksportqa jiberildi.  

Bul ámeliyat aymaqta isbilermenlik hám qusshılıq
tarawı rawajlanıp, eksport potencialı keńeyip atırǵanınıń ámeliy kórinisi bolıp
esaplanadı. 

A.KAMALOV Xalıq deputatları Kegeyli rayonlıq Keńesi
deputatı, rayon hákimi