O‘zbekiston Respublikasi Prezidentining 2025-yil 30-maydagi PF-90-sonli “Yashil makon” umummilliy loyihasi doirasida hamda o‘rmonlarni boshqarish tizimida islohotlarni izchil davom ettirish, yashil hududlarni kengaytirish chora-tadbirlari to‘g‘risidagi Farmoni, shuningdek Xalq deputatlari Marg‘ilon shahar Kengashining 2025-yil 30-dekabrdagi VII-17-101-11-168-K/25-son qarori ijrosini ta’minlash maqsadida navbatdagi nazorat-tahlil tadbiri o‘tkazildi.

Mazkur tadbir shahar Kengashi kotibiyati mudiri A.Ermatov boshchiligida tashkil etilib, unda Agrar suv xo‘jaligi va ekologiya masalalari bo‘yicha doimiy komissiya raisi oʻrinbosari M.Abdurahmonova va komissiya a’zolari hamda kotibiyat bosh mutaxassisi Z.Yakubova ishtirok etdi.

Nazorat tadbiri davomida “Yashil makon” umummilliy loyihasi doirasida shaharda daraxt va buta ko‘chatlarini ekish borasida amalga oshirilgan ishlar atroflicha o‘rganildi.

Shahar ekologiya va atrof-muhitni muhofaza qilish bo‘limi boshlig‘i N. G‘ulomov tomonidan berilgan ma’lumotga ko‘ra, 2026-yil bahor mavsumi uchun reja 96,5 ming tup ko‘chat ekishni tashkil etadi. Bugungi kunga qadar “Yashilmakon.есо” platformasiga kiritilgan ko‘rsatkich 132,3 ming tupni tashkil etib, bu rejaning 137 foizga bajarilganini ko‘rsatmoqda. Shuningdek, ekologiya inspektorlari tomonidan tasdiqlangan ko‘rsatkich 105,6 ming tup bo‘lib, bu 109 foizni tashkil etadi.

O‘rganishlar jarayonida ayrim kamchiliklar ham aniqlandi. Xususan, qarorga muvofiq “Yashil makon” hududlari uchun ajratilgan yer maydonlarini tayyorlash hamda sug‘orish tizimini tashkil etish ishlari ayrim joylarda to‘liq yakuniga yetkazilmagani ma’lum bo‘ldi.

Mazkur holat yuzasidan tegishli choralar ko‘rish maqsadida shahar hokimi o‘rinbosari nomiga deputat so‘rovi yuborilishi belgilab olindi.

Xalq deputatlari Marg‘ilon shahar Kengashi tomonidan “Yashil makon” umummilliy loyihasi doirasidagi ishlar doimiy nazoratda bo‘lib, hududni yanada obodonlashtirish, ekologik holatni yaxshilash borasidagi ishlar davom ettiriladi.