Quva tumani Kengashining navbatdagi sessiyasi bo‘lib o‘tdi 

Bugun Xalq deputatlari Quva tumani Kengashining yigirma birinchi sessiyasi bo‘lib o‘tdi. Unda tuman hokimi,
tumandan saylangan viloyat Kengashi deputatlari, tuman hokimining o‘rinbosarlari,
kun tartibiga kiritilgan masalalarga aloqador bo‘lgan bo‘lim, tashkilot va idoralar
rahbarlari, shuningdek ommaviy axborot vositalari vakillari ishtirok etdilar. 

Sessiya ishida dastlab 2026 yilda Quva tumani hududlarini yangicha yondashuvlar asosida rivojlantirish
orqali aholi daromadlarini oshirish, barqaror ish o‘rinlarini yaratish hamda kambag‘allikni
qisqartirish chora-tadbirlari muhokama qilindi. 

Mazkur masala yuzasidan tuman iqtisodiyot va moliya bo‘limi boshlig‘ining o‘rinbosari Axrorjon
Siddiqov hisobot berib, kelgusida amalga oshiriladigan vazifalar yuzasidan batafsil
ma’lumot taqdim etdi. 

Sessiya kun tartibida, shuningdek, tumanda O‘zbekiston Respublikasining “Yoshlarga oid davlat
siyosati to‘g‘risida”gi Qonuni ijrosi hamda tuman yoshlari bilan olib borilayotgan
ishlar to‘g‘risida tuman hokimining yoshlar siyosati, ijtimoiy rivojlantirish va
ma’naviy-ma’rifiy ishlar hamda turizm bo‘yicha o‘rinbosari U. Solijonovning hisoboti
tinglandi. 

Sessiya davomida tuman obodonlashtirish boshqarmasi tasarrufidagi ichki yo‘llarni saqlash va joriy
ta’mirlash bo‘yicha olib borilayotgan ishlar to‘g‘risida tuman obodonlashtirish
boshqarmasi ichki yo‘llar bo‘limi boshlig‘i B. Mo‘ydinov ham hisobot berdi. 

Sessiya yakunida ko‘rib chiqilgan masalalar yuzasidan tegishli qarorlar qabul qilinib, mas’ullarga
aniq vazifalar yuklatildi. Belgilangan topshiriqlarni o‘z vaqtida va sifatli ijro
etish ustuvor vazifa sifatida qayd etildi.