Mahalla raisining faoliyati qonun va xalq manfaatlari mezonlari asosida tahlil qilindi.

Xalq deputatlari Olmaliq shahar Kengashi deputati Muhiddin Abdullayev hamda Kotibiyat mudiri Sevar Qodirova tomonidan "Abdulla Qahhor" mahallasida navbatdagi jamoatchilik nazorati tadbiri amalga oshirildi. Ushbu o‘rganishning bosh maqsadi — O‘zbekiston Respublikasi Prezidentining 209-sonli farmoni bilan mahalla raisiga yuklatilgan mas’uliyatli vazifalarning amaldagi ijrosini o'rganishdan iborat bo‘ldi.

Deputatlar tomonidan mahalla raisining faoliyati quyidagi 5 ta asosiy yo‘nalish bo‘yicha sinchkovlik bilan ko‘zdan kechirildi:

🔹Obodlik va ijtimoiy ko‘mak: Rais tomonidan har oyda o‘tkazilishi lozim bo‘lgan ommaviy hashar ishlarining sifati hamda ehtiyojmand oilalar xonadonlarini ta’mirlashga qaratilgan tashabbuslar tahlil qilindi.

🔹Ma’naviy-ma’rifiy ishlar: To‘y-marosimlarni ixchamlashtirish va isrofgarchilikning oldini olish bo‘yicha aholi o‘rtasida olib borilayotgan tushuntirish ishlarining natijadorligi o‘rganildi.

🔹Davlat organlarini safarbar etish: Mahallaga biriktirilgan tashkilot vakillarining aholi muammolarini hal etishdagi ishtiroki hamda raisning ularga nisbatan talabchanligi ko‘rib chiqildi.

🔹"Mahalla yettiligi" ustidan rahbarlik: Hokim yordamchisi, yoshlar yetakchisi va boshqa mas’ullarning haftalik hisobotlari eshitilishi hamda har oyda kamida 10 tadan real muammoning hal etilishi yuzasidan o‘rnatilgan nazorat tizimi tekshirildi.

🔹Jamoatchilik nazorati: Maktabdagi davomat, poliklinika xizmati va tadbirkorlik obyektlarining sanitar holati bo‘yicha rais tomonidan o‘tkazilgan haftalik o‘rganishlar hujjatlari ko‘zdan kechirildi.

O‘rganish davomida deputat Muhiddin Abdullayev mahalla raisi tomonidan amalga oshirilgan ijobiy ishlarni e’tirof etish bilan birga, aholi murojaatlari bilan ishlashda tezkorlikni oshirish yuzasidan o‘z tavsiyalarini berdi.

✍️O‘rganish yakunlari bo‘yicha aniqlangan masalalar yuzasidan mahalla mas’ullariga aniq muddatli ko‘rsatmalar berildi. Bunday deputatlik o‘rganishlari shahrimizning barcha mahallalarida tizimli ravishda davom ettiriladi