Ichki yo‘laklardagi muammo deputat tomonidan o‘rganildi

Xalq deputatlari Navoiy shahar Kengashi deputati Xasanova Gulshan Zokirovna joriy yilning 18-mart kuni A. Temur ko‘chasi 42-uy hamda G‘alaba shoh ko‘chasi 125-uylar oralig‘idagi o‘tish yo‘lagi va ushbu hududlarning orqa hovlilaridagi yo‘laklarda mavjud holatni o‘rgandi.

O‘rganish jarayonida aniqlanishicha, mazkur hududlarda yog‘ingarchilik mavsumlarida yomg‘ir suvlari to‘planib qolishi natijasida yo‘laklar ko‘lmakka aylanib, aholining erkin harakatlanishiga noqulayliklar tug‘dirmoqda. Ayniqsa, piyodalar, keksalar va bolalar uchun bu holat qiyinchiliklar keltirib chiqarayotgani qayd etildi.

Shuningdek, yo‘laklarda suvni chiqarib yuborish tizimining yetarli darajada yo‘lga qo‘yilmagani hamda hududning past-balandligi sabab suvning oqib ketmasdan to‘planib qolayotgani kuzatildi. Bu esa nafaqat yurish uchun noqulaylik tug‘diradi, balki sanitariya holatiga ham salbiy ta’sir ko‘rsatishi mumkin.

Deputat tomonidan mas’ul tashkilotlar e’tiboriga mazkur muammoni bartaraf etish, xususan, drenaj tizimini yaxshilash, yo‘laklarni ta’mirlash va hududni obodonlashtirish yuzasidan tegishli taklif va tavsiyalar bildirildi.

Mazkur o‘rganish ishlari hudud infratuzilmasini yaxshilash, aholiga qulay sharoit yaratish hamda obodonlashtirish ishlarini izchil davom ettirishda muhim ahamiyat kasb etadi.