Xususan, avvalroq Xalq deputatlari Marg‘ilon shahar Kengashi deputatlari tomonidan Bobur MFY Sohibkor ko‘chasi fuqarolarining ichimlik suvi ta’minoti bilan bog‘liq murojaati joyiga chiqib o‘rganilgan edi. O‘rganishlar natijasida muammoni hal etish yuzasidan aniq chora-tadbirlar belgilandi.

O‘zbekiston Respublikasi Prezidentining 2025-yil 30-yanvardagi PF-17-son Farmoni asosida shahar Kengashining tegishli qarori bilan Bobur MFY Sohibkor ko‘chasiga 300 metr uzunlikdagi ichimlik suvi tarmog‘ini tortish uchun zarur mablag‘lar ajratildi.

Shundan so‘ng deputatlar mas’ul tashkilot vakillari bilan birgalikda mavjud holatni muhokama qilib, ajratilgan mablag‘larning maqsadli sarflanishi yuzasidan nazorat-tahlil ishlarini olib borgan edi.

Bugungi kunda esa mazkur hududda ichimlik suvi tarmog‘ini tortish ishlari amalda boshlangan bo‘lib, jarayon yana bir bor joyiga chiqib o‘rganildi. Unda Xalq deputatlari Marg‘ilon shahar Kengashi deputatlari, Kengash kotibiyati mudiri A.Ermatov, kotibiyat bosh mutaxassisi Z.Yakubova hamda O‘EP shahar partiya tashkiloti raisi M.Abdurahmonova ishtirok etdilar.

O‘rganish davomida olib borilayotgan qurilish-montaj ishlari, ularning sifati va belgilangan muddatlarga muvofiqligi atroflicha ko‘rib chiqildi. Shuningdek, mas’ullarga ishlarni sifatli va o‘z vaqtida yakunlash, ajratilgan mablag‘lardan oqilona foydalanish yuzasidan tegishli tavsiyalar berildi.

Mazkur ishlar natijasida Sohibkor ko‘chasi aholisi uchun ichimlik suvi ta’minoti yaxshilanib, fuqarolarning turmush sharoitini yanada yaxshilashga xizmat qilishi kutilmoqda.