Xalq deputatlari Parkent tuman Kengashiga 13-Istiqbol saylov okrugidan saylangan deputat Mahmudova Baxtinisa Zuxriddinovna tomonidan jamoatchilik nazoratini amalga oshirish maqsadida Parkent tumanidagi Davlat xizmatlari markaziga tashrif buyurildi. Tashrif davomida deputat Davlat xizmatlari markazi xodimlari tomonidan aholiga xizmat ko‘rsatilishi jarayoni bilan yaqindan tanishdi. Jarayon davomida davlat xizmatlari tizimida amalga oshirilayotgan islohotlar, yangiliklar hamda fuqarolar uchun yaratilayotgan qulayliklar yuzasidan batafsil ma’lumotlar berildi. Shuningdek, markaz rahbari D.Turdialiyev bilan ham suhbat o‘tkazildi. Suhbat davomida markazda 5 nafar xodim tomonidan aholiga raqamlashtirilgan tizim asosida sifatli xizmat ko‘rsatib kelinayotgani ma’lum qilindi. Bugungi kunda tadbirkorlik subyektlarini davlat ro‘yxatidan o‘tkazish jarayoni “15 daqiqada” tamoyili asosida tashkil etilgani, bu esa fuqarolar va tadbirkorlar uchun katta qulaylik yaratib berayotgani ta’kidlandi. Shuningdek, 2026-yildan boshlab haydovchilik guvohnomasini olish hamda intellektual mulk obyektlarini davlat ro‘yxatidan o‘tkazish xizmatlari ham aholiga qulaylik yaratish maqsadida yo‘lga qo‘yilgani haqida ma’lumot berildi. Markazda fuqarolar uchun kutish zallari, ona va bolalar uchun alohida xonalar tashkil etilgan bo‘lib, ular zamonaviy talablar darajasida jihozlangan. Deputat tomonidan davlat xizmatlarini aholiga yanada qulay va sifatli ko‘rsatish bo‘yicha bir qator takliflar bildirildi. Jumladan, olis va chekka hududlarda sayyor xizmatlarni tashkil etish, ayniqsa yoshlar o‘rtasida davlat xizmatlaridan masofadan turib Yagona interaktiv davlat xizmatlari portali orqali foydalanishni keng targ‘ib etish zarurligi ta’kidlandi. Bu borada “mahalla yettiligi” bilan samarali hamkorlikni yo‘lga qo‘yish hamda fuqarolarning davlat xizmatlaridan onlayn tarzda foydalanish ko‘nikmalarini oshirish muhimligi qayd etildi.