Sog‘lom kelajak poydevori bugungi g‘amxo‘rlikdan boshlanadi!

Olmaliq shahridagi Perinatal markazi nafaqat shahar, balki hududiy ahamiyatga ega bo‘lgan eng muhim tibbiyot muassasalaridan biri hisoblanadi. Xalq deputatlari Olmaliq shahar Kengashi deputati Shodiya Alijonova ushbu markazda ona va bolalar uchun yaratilgan sharoitlarni ko‘zdan kechirish maqsadida o‘rganish o‘tkazdi.

Deputat tomonidan muassasa faoliyati quyidagi mezonlar asosida tahlil qilindi:

Ayollar uchun yaratilgan qulayliklar: Tug‘ruq va undan keyingi bo‘limlardagi sharoitlar, xonalarning issiqlik tizimi va sanitar holati.

Bepul dori-darmon ta’minoti: Davlat tomonidan kafolatlangan bepul dori-darmonlarning bemorlarga yetib borishi va dorixona zaxiralarining mavjudligi.

Chaqaloqlar parvarishi: Yangi tug‘ilgan chaqaloqlar, ayniqsa, alohida parvarishga muhtoj go‘daklar uchun zamonaviy tibbiy uskunalar va sharoitlarning holati.

O‘rganishning eng muhim qismi — markazda davolanayotgan onalar bilan o‘tkazilgan suhbat bo‘ldi. Shodiya Alijonova har bir murojaatni tinglab, tibbiy xizmat ko‘rsatish sifati va xodimlarning muomalasi yuzasidan ularning fikrlarini o‘rgandi.

"Bizning asosiy vazifamiz — har bir ona o‘zini xavfsiz va e’tiborda his qilishini ta’minlashdir. Tibbiyotda korrupsiya bo‘lmasligi va bepul berilishi kerak bo‘lgan dori-darmonlar o‘z egalariga to‘liq yetib borishi deputatlik nazoratining qat’iy talabidir," — deya ta’kidladi deputat.

📋Muammo va yechimlar

O‘rganish davomida aniqlangan ayrim texnik va tashkiliy kamchiliklar yuzasidan markaz mas’ullari bilan birgalikda chora-tadbirlar belgilandi. Aniqlangan muammolarni bartaraf etish bo‘yicha aniq vazifalar yuklanib, ijrosi deputatlik nazoratiga olindi.