Xalq deputatlari Guliston shahar Kengashi deputati Dilorom Xolmatova tomonidan shaharning Ulug‘ yo‘l mahallasida hokim yordamchisining faoliyati, aholi tomorqalardan foydalanish darajasi hamda tomorqa yerlarini oqar suv bilan ta’minlash holati o‘rganildi.

O‘rganish jarayonida mahalla aholisi tomorqalari va ularni sug‘orish uchun mavjud infratuzilma holati joyiga chiqib ko‘zdan kechirildi. Kuzatuvlar davomida ayrim ko‘chalardagi ariqlarda suvning oqimi to‘xtab qolganligi, natijada suvlar ayrim joylarda to‘planib qolayotgani aniqlanib, bu esa tomorqalarga suv yetib bormasligiga hamda ayrim joylarda yo‘l va hududlarga toshib ketish holatlariga sabab bo‘layotgani qayd etildi.

Xususan, Navro‘z ko‘chasida joylashgan 5-son maktabgacha ta’lim muassasasi atrofidagi ariqlar hamda ushbu ko‘chadagi lotoklar holati misol sifatida ko‘rib chiqildi.

O‘rganish yakunlari bo‘yicha mas’ul tashkilotlarga aniqlangan muammolarni bartaraf etish, ariqlarni tozalash hamda suv oqimini tiklash bo‘yicha tegishli deputatlik so`rovi yuborildi.