Yig‘ilishda O‘zbekiston Respublikasi Vazirlar Mahkamasining 2022-yil 7-iyundagi 312-sonli qarori ijrosi doirasida “Yoshlar daftari” jamg‘armasi mablag‘laridan foydalanish masalasi ko‘rib chiqildi.

Kun tartibidagi masala yuzasidan Yoshlar ishlari agentligi Termiz shahar bo‘limi boshlig‘i F.Xalmuratov axborot berib, may–iyun oylarida besh muhim tashabbus doirasida o‘tkazilgan tanlov va musobaqalarning shahar bosqichida g‘olib bo‘lgan jamoalarni qimmatbaho sovg‘alar bilan taqdirlash marosimlarini tashkil etish uchun “Yoshlar daftari” jamg‘armasidan mablag‘ ajratish bo‘yicha takliflarni taqdim etdi.

Muhokamalar davomida komissiya a’zolari mablag‘lardan maqsadli va samarali foydalanish, yoshlarni sport, madaniyat va ijodiy faoliyatga keng jalb etish, ularning tashabbuslarini qo‘llab-quvvatlash masalalari yuzasidan o‘z fikr va takliflarini bildirdilar.

Yig‘ilish yakunida mazkur masalani batafsil ko‘rib chiqish va tegishli qaror qabul qilish uchun Xalq deputatlari Termiz shahar Kengashining navbatdagi sessiyasi kun tartibiga kiritish bo‘yicha qaror qabul qilindi.