Xalq deputatlari Qo‘qon shahar Kengashi deputati Sh.Dexkonov tomonidan yoshlar siyosati sohasida amalga oshirilayotgan ishlarni o‘rganish hamda ularning natijadorligini tahlil qilish maqsadida Qo‘qon shahar Yoshlar ishlari agentligiga deputatlik so‘rovi yuborildi.

Deputatlik so‘rovida 2025-yil va 2026-yilning birinchi choragi davomida yoshlar bilan ishlash bo‘yicha amalga oshirilgan ishlar yuzasidan batafsil ma’lumot taqdim etish so‘ralgan.

Xususan, quyidagi yo‘nalishlar bo‘yicha axborotlar talab etildi:
«Yoshlar balansi» va «Yoshlar daftari» tizimlari yuritilishi;
Mahallalarda «Besh tashabbus olimpiadasi» doirasida o‘tkazilgan madaniy va sport tadbirlari;
Ishsiz yoshlarni bandlikka jalb qilish va tadbirkorlikka yo‘naltirish ishlari;
Huquqbuzarlikka moyil yoshlar bilan olib borilayotgan profilaktik tadbirlar;
«Yoshlar daftari» jamg‘armasi hisobidan ajratilgan subsidiya va ko‘maklar.

Shuningdek, deputat tomonidan yoshlar uchun ajratilgan mehnat qurollari, ta’lim va xorijiy til kurslari xarajatlarini qoplash, imtiyozli kreditlar, mikroqarzlar, oilaviy tadbirkorlik dasturlari, ipoteka subsidiyalari, davolanish xarajatlari hamda boshqa qo‘llab-quvvatlash mexanizmlarining amaldagi holati yuzasidan ham ma’lumotlar so‘ralgan.

⚖Mazkur deputatlik so‘rovi yoshlar bilan ishlash tizimining samaradorligini oshirish, mavjud imkoniyatlardan foydalanish darajasini tahlil qilish hamda yoshlarning muammolarini hal etish bo‘yicha qo‘shimcha choralarni belgilashga xizmat qiladi.

Mazkur masala deputat nazoratiga olingan bo‘lib, uning ijrosi yuzasidan qo‘shimcha ma’lumotlar berib boriladi.

Xalq deputatlari Qo‘qon shahar Kengashi