Xalq deputatlari Qo‘qon shahar Kengashi deputati Sh.Xasanova tomonidan fuqaro Ne’matjonova O‘g‘iloyga bepul jarrohlik amaliyotini o‘tkazish hamda zarur tibbiy yordam ko‘rsatish masalasida yuborilgan deputatlik so‘roviga Qo‘qon shahar Tibbiyot birlashmasi boshlig‘i K.B. Sirojiddinov tomonidan rasmiy javob xati taqdim etildi.

Deputatlik so‘rovi asosida Qo‘qon shahar 10-oilaviy poliklinikasi bosh shifokori F. Mamajonov, oila shifokori S. Anvarova hamda patronaj hamshirasi X. Ergasheva tomonidan “Rayhon” MFYda yashovchi fuqaro Ne’matjonova O‘g‘iloyning salomatligi joyiga chiqqan holda atroflicha o‘rganildi.

Taqdim etilgan rasmiy javobga ko‘ra, fuqaroning asosiy tashxisi yuzasidan bepul jarrohlik amaliyotini o‘tkazishga tayyorgarlik ko‘rish va uning umumiy salomatlik holatini chuqur baholash maqsadida kengaytirilgan tibbiy ko‘rik tashkil etildi. Ko‘rik davomida qo‘shimcha ravishda reaktiv artropatiya kasalligi aniqlangan.

️Ayni vaqtda aniqlangan qo‘shimcha kasallik bo‘yicha tor doiradagi mutaxassis shifokorlar tomonidan tegishli davolash muolajalari olib borilmoqda. Ushbu muolajalar yakunlangach, tibbiy ko‘rik natijalaridan kelib chiqib, fuqaroning asosiy kasalligi bo‘yicha bepul jarrohlik amaliyotini o‘tkazish uchun belgilangan tartibda imtiyozli yo‘llanma rasmiylashtirish rejalashtirilgan.

Ushbu masala deputat nazoratida bo‘lib, fuqaroning davolanish jarayoni, bepul jarrohlik amaliyotiga yo‘llanma rasmiylashtirilishi hamda tibbiy yordam ko‘rsatish bilan bog‘liq ishlarning izchil davom ettirilishi kuzatib boriladi.

Xalq deputatlari Qo‘qon shahar Kengashi