Atrof-muhitni muhofaza qilish va kompensatsiya to‘lovlari ijrosi o‘rganiladi

Xalq deputatlari Pastdarg‘om tumani Kengashining Agrar, suv xo‘jaligi va ekologiya masalalari bo‘yicha doimiy komissiyasi tomonidan O‘zbekiston Respublikasi Vazirlar Mahkamasining 2021-yil 12-apreldagi 202-son qarori talablarining tumanda ijro etilishi holatini o‘rganish bo‘yicha ishlar boshlandi.

📌 Doimiy komissiya raisi Feruz Turayev tomonidan tegishli mas’ul tashkilotlarga 2026-yil boshidan buyon amalga oshirilgan ishlar yuzasidan batafsil ma’lumot taqdim etish so‘raldi.

🔎 O‘rganish doirasida quyidagi masalalarga alohida e’tibor qaratiladi:
atrof-muhitni ifloslantiruvchi manbalar va ularning hisobini yuritish holati;
ifloslantirganlik hamda chiqindilarni joylashtirganlik uchun hisoblangan va undirilgan kompensatsiya to‘lovlari;
ekologik qonunbuzilishlar, aniqlangan kamchiliklar va ularni bartaraf etish choralari;
noqonuniy chiqindi tashlash va oqova suvlarni ruxsat etilmagan joylarga oqizish holatlarining oldini olish;
kompensatsiya to‘lovlarini hisoblash va undirishdagi mavjud muammolar.

♻️ Shuningdek, ekologik nazorat samaradorligi, tabiatga salbiy ta’sirni kamaytirish hamda “ifloslantiruvchi to‘laydi” tamoyiliga rioya etilishi holati ham o‘rganiladi.

📋 So‘ralgan ma’lumotlarni 2026-yil 20-oktabrga qadar tuman Kengashiga taqdim etish belgilangan.

O‘rganish natijalari asosida mavjud muammolarni bartaraf etish yuzasidan takliflar ishlab chiqilib, masala doimiy komissiya tomonidan deputatlik nazorati tartibida ko‘rib chiqiladi.

✅ Maqsad — atrof-muhitni muhofaza qilish, ekologik qonunbuzilishlarning oldini olish va belgilangan talablar ijrosi ustidan samarali deputatlik nazoratini ta’minlash.