ELEKTRON HUKUMAT TIZIMI IJROSI O‘RGANILMOQDA

Xalq deputatlari Pastdarg‘om tumani Kengashining Mahalliy budjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasi tomonidan tumanda elektron hukumat tizimini rivojlantirish hamda davlat organlari va tashkilotlarining jamoatchilik oldida elektron hisobot berishi tartibining ijro etilishi holatini o‘rganish ishlari olib borilmoqda.

Shu munosabat bilan komissiya tomonidan Pastdarg‘om tumani hokimining raqamli texnologiyalar va sun’iy intellekt texnologiyalarini rivojlantirish masalalari bo‘yicha maslahatchisi S.Xurramovga rasmiy xat yuborildi.
O‘rganish jarayonida quyidagi masalalarga alohida e’tibor qaratilmoqda:
🔹 tumanda elektron hukumat tizimini rivojlantirish bo‘yicha 2026-yilda amalga oshirilayotgan ishlar;
🔹 aholi va tadbirkorlik subyektlariga elektron davlat xizmatlaridan foydalanish imkoniyatlarini kengaytirish;
🔹 davlat xizmatlarini elektron shaklda ko‘rsatish ko‘lami va mavjud muammolar;
🔹 davlat organlari va tashkilotlarining rasmiy veb-saytlari hamda elektron resurslarida ochiq ma’lumotlarni joylashtirish va yangilab borish holati;
🔹 tashkilotlarning jamoatchilik oldida elektron hisobot berish amaliyoti;
🔹 aholi murojaatlari, taklif va shikoyatlarini elektron shaklda qabul qilish va ko‘rib chiqish tizimi;
🔹 elektron hujjat aylanishi, idoralararo elektron hamkorlik va axborot almashinuvi;
🔹 elektron hukumat doirasida foydalanilayotgan axborot tizimlari va ularning integratsiyalashuvi;
🔹 tumanning olis va chekka hududlarida aholining elektron davlat xizmatlaridan foydalanish imkoniyatlari;
🔹 davlat organlari xodimlarining raqamli ko‘nikmalarini oshirish bo‘yicha amalga oshirilgan ishlar.
📊 Shuningdek, o‘rganish doirasida 2026-yil boshidan buyongi davr qamrab olinib, aniq raqam va ko‘rsatkichlar, amalga oshirilgan ishlar, mavjud muammolar, ularning sabablari hamda muammolarni bartaraf etish bo‘yicha ko‘rilayotgan choralar tahlil qilinadi.
🎯 Mazkur o‘rganishdan ko‘zlangan asosiy maqsad — tumanda raqamlashtirish jarayonlarini jadallashtirish, elektron davlat xizmatlaridan foydalanish imkoniyatlarini kengaytirish, davlat organlarining ochiqligi va jamoatchilikka elektron hisobot berish amaliyotini takomillashtirishdan iborat.
O‘rganish yakunlari bo‘yicha aniqlangan muammolar yuzasidan tegishli taklif va tavsiyalar ishlab chiqiladi.
Xalq deputatlari Pastdarg‘om tumani Kengashi
Mahalliy budjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasi