Xalq deputatlari tuman Kengashining 2026-yilga mo‘ljallangan ish rejasiga muvofiq Korrupsiyaga qarshi kurashish, davlat organlarida ochiqlikni ta’minlash va huquqiy masalalar bo‘yicha doimiy komissiya raisi M.Mirabdullayev tumanda aholiga maishiy chiqindilarni olib chiqib ketish xizmati bo‘yicha qonunchilik hujjatlariga rioya etilishi, mavjud muammolarni bartaraf etish masalalari bo‘yicha o‘rganish o‘tkazdi.

🟢O‘rganish davomida aholi tomonidan bildirilayotgan e’tirozlar, xususan, maishiy chiqindilarni belgilangan grafik asosida olib chiqib ketish talabiga to‘liq rioya etilmayotganligi masalasiga alohida e’tibor qaratildi.

🟢“Rahnamo Servis” MChJ rahbari U.Normetov bilan bo‘lib o‘tgan muloqot davomida chiqindilarni o‘z vaqtida olib chiqib ketishda maxsus texnikalar yetishmasligi ham muhim muammolardan biri sifatida qayd etildi. Texnik imkoniyatlarning cheklanganligi xizmat ko‘rsatish jarayoniga ta’sir ko‘rsatishi mumkinligi inobatga olinib, mavjud transport vositalaridan samarali foydalanish, chiqindilarni tashish jarayonini to‘g‘ri tashkil etish va belgilangan jadvalga amal qilish masalalari yuzasidan fikr almashildi.

🟢Shuningdek, aholi chiqindilarini belgilangan joyda to‘plash uchun maxsus chiqindi to‘plash punktini tashkil etish bo‘yicha bildirilgan fikr va takliflar tinglandi. Bunday punktni tashkil etish masalasida hududning o‘ziga xos xususiyatlari, aholi uchun qulayliklar, sanitariya-gigiyena talablari hamda chiqindilarni o‘z vaqtida olib chiqib ketish imkoniyatlarini hisobga olish muhimligi ta’kidlandi.

🟢Maishiy chiqindilarni o‘z vaqtida olib chiqib ketish aholi uchun qulay yashash muhitini yaratish, hududning sanitariya holatini saqlash va atrof-muhit ifloslanishining oldini olishda muhim ahamiyatga ega. Shu bois xizmat ko‘rsatuvchi korxona tomonidan aholiga yetkazilayotgan xizmat sifatini oshirish, belgilangan grafikka qat’iy rioya etish va mavjud muammolarni bartaraf qilish bo‘yicha doimiy komissiya raisi tomonidan tegishli tavsiyalar berildi.