#Doimiy_komissiya_faoliyati #162_ta_Qonun_ijrosi #kotibiyat_mudiri_faoliyati #Haftalik_ish_reja_ijrosi #nazorat_tahlil #deputat_faoliyati #kuz_qishga_tayyorgarlik

13-MTTda qonun ijrosi va kuz-qish mavsumiga tayyorgarlik holati o‘rganildi

Xalq deputatlari tuman Kengashining 9-Gilambob saylov okrugida deputatlik nazorati doirasida o‘rganish ishlari olib borildi.

Tuman Kengashi kotibiyati mudiri K.Muhammadiyev hamda Kengashning Mahalliy budjet, tadbirkorlikni rivojlantirish va iqtisodiy islohotlar bo‘yicha doimiy komissiyasi raisi B.Ochildiyev tomonidan “Gilambob” mahallasida joylashgan 13-sonli maktabgacha ta’lim tashkiloti faoliyati o‘rganildi.

O‘rganish jarayonida O‘zbekiston Respublikasining “Maktabgacha ta’lim va tarbiya to‘g‘risida”gi Qonuni (O‘RQ-595-son, 16.12.2019-yil) ijrosini ta’minlash holati bo‘yicha tayyorlangan maxsus savolnoma asosida tegishli masalalar ko‘rib chiqildi.

Jumladan, maktabgacha ta’lim tashkilotida bolalarga ta’lim-tarbiya berish uchun yaratilgan shart-sharoitlar, tarbiyalanuvchilar xavfsizligi, ta’lim-tarbiya jarayonining tashkil etilishi, mavjud moddiy-texnik baza hamda qonun talablarining amalda bajarilishi bilan bog‘liq masalalarga e’tibor qaratildi.

Shuningdek, muassasaning 2026/2027-yillar kuz-qish mavsumiga tayyorgarlik holati ham ko‘zdan kechirildi. Bunda binoning isitish tizimi, mavjud jihozlarning holati, mavsumni betalofat o‘tkazish uchun zarur shart-sharoitlarning yaratilgani hamda aniqlangan kamchiliklarni bartaraf etish masalalari o‘rganildi.

O‘rganish yakunlari bo‘yicha aniqlangan masalalar yuzasidan tegishli taklif va tavsiyalar ishlab chiqilib, ularning ijrosi deputatlik nazorati doirasida kuzatib borilishi belgilandi.

Qiziriq tumani Kengashi Axborot xizmati 
Rasmiy sahifalarimiz👇
Telegram | Facebook | E-kengash |Instagram