Inson qadri, uning huquq va manfaatlarini ta’minlash — ijtimoiy siyosatning eng muhim ustuvor yo‘nalishlaridan biridir. Ayniqsa, nogironligi bo‘lgan shaxslarni har tomonlama qo‘llab-quvvatlash, ular uchun yaratilgan imkoniyat va imtiyozlarning amalda to‘laqonli ishlashini ta’minlash alohida e’tibor talab etadi.
🔵 Davlat tomonidan nogironligi bo‘lgan shaxslarga berilayotgan ijtimoiy yordam, imtiyoz va xizmatlarning o‘z vaqtida, qonuniy va manzilli tarzda yetkazilishi ularning kundalik hayotini yengillashtirish, jamiyatda faol ishtirokini ta’minlash hamda munosib turmush sharoitini yaratishda muhim ahamiyat kasb etadi.
🔵 Shu maqsadda Xalq deputatlari Parkent tumani Kengashiga 12-“O‘choq” saylov okrugidan saylangan deputat Xikmatova Marxabo Sulxonberdi qizi tomonidan “O‘choq” MFY hududida faoliyat yuritayotgan ijtimoiy xodim Yakubova Dilso‘zning ish faoliyati deputatlik nazorati doirasida o‘rganildi.
🔵 O‘rganish jarayonida mahalladagi ijtimoiy reyestr bilan ishlash, fuqarolarning ehtiyojlarini aniqlash, ularga ko‘rsatilayotgan ijtimoiy xizmatlar hamda davlat tomonidan ajratilayotgan yordamlarning manzilliligi va samaradorligiga alohida e’tibor qaratildi.
📊 Ijtimoiy reyestrda jami 60 nafar fuqaro mavjud bo‘lib, shundan 50 nafariga turli yo‘nalishlarda ijtimoiy yordamlar ko‘rsatilgani ma’lum bo‘ldi.
🔵 Shuningdek, ijtimoiy himoyaga muhtoj fuqarolardan 1 nafari yangi uy-joy bilan ta’minlangan.
🔵 O‘rganishning muhim yo‘nalishlaridan biri — nogironligi bo‘lgan shaxslarga davlat tomonidan belgilangan imtiyoz va ko‘maklarning to‘g‘ri qo‘llanilishi holatini ko‘rib chiqish bo‘ldi.
🔵 Chunki har bir imtiyoz ortida insonning huquqi, ehtiyoji va manfaatlari turadi. Belgilangan yengilliklarning o‘z vaqtida va to‘g‘ri qo‘llanilishi nogironligi bo‘lgan fuqarolarning hayot sifatini yaxshilash, ularning ijtimoiy himoyasini kuchaytirish va jamiyatdagi teng imkoniyatlarini ta’minlashga xizmat qiladi.
🔵 Ijtimoiy himoya — bu faqat moddiy ko‘mak ko‘rsatish emas. Bu, avvalo, insonni tinglash, uning muammosini o‘rganish, ehtiyojini aniqlash va amaliy yechim topish demakdir.
🔵 Mahalladagi ijtimoiy xodimlarning faoliyati aynan shu jihatdan muhim bo‘lib, ular aholining ehtiyojmand qatlamlari bilan bevosita ishlash, muammolarni joyida aniqlash va tegishli tashkilotlar bilan hamkorlikda ularni hal etishda muhim bo‘g‘in hisoblanadi.
🔵 Deputatlik nazorati esa ushbu jarayonlarning qonuniyligi, shaffofligi va samaradorligini ta’minlashga xizmat qiladi. Fuqarolarga ajratilgan yordam va berilgan imtiyozlar haqiqatan ham ehtiyojmand insonlarga yetib borishi, ularning huquqlari to‘liq ta’minlanishi doimiy e’tiborda bo‘lishi zarur.
➡️ Har bir inson e’tiborda, har bir murojaat nazoratda, har bir yordam manzilli bo‘lishi kerak!
⚠️ Zero, inson qadri ulug‘langan jamiyatdagina chinakam ijtimoiy adolat va mehr-oqibat muhitini qaror toptirish mumkin.