Xalq deputatlari Arnasoy tuman Kengashi deputatlari, tuman Kengashi huzurida tashkil etilgan ekspert hamda yoshlar maslahat guruhlari a’zolari ishtirokida O‘zbekiston Respublikasi Oliy Majlisi Senati Kengashining 2025-yil 14-yanvardagi KQ-35-V-sonli “Hududlarni rivojlantirish hamda aholi muammolarini hal etishda mahalliy Kengashlarning “mahalla yettiligi” bilan o‘zaro hamkorligini yanada kuchaytirish chora-tadbirlari to‘g‘risida”gi qarori ijrosi yuzasidan tumandagi mahalla fuqarolar yig‘inlari raislari bilan uchrashuv o‘tkazildi.

Uchrashuvda mahalliy Kengashlar deputatlari va “mahalla yettiligi” o‘rtasida samarali hamkorlikni yo‘lga qo‘yish, hududlarda aholini qiynayotgan muammolarni aniqlash, ularni manzilli o‘rganish hamda mavjud masalalarni tegishli tashkilotlar bilan hamkorlikda hal etish mexanizmlari muhokama qilindi.

Shuningdek, deputatlarning o‘z saylov okruglarida aholi bilan bevosita muloqotini yanada kuchaytirish, fuqarolarning murojaat va takliflarini tizimli ravishda o‘rganish, aniqlangan muammolarni mahalla darajasida ko‘rib chiqish hamda ularning yechimini ta’minlashda “mahalla yettiligi” bilan o‘zaro axborot almashish va hamkorlikni kuchaytirish masalalariga alohida e’tibor qaratildi.

Muloqot davomida mahalla hududlaridagi ijtimoiy-iqtisodiy masalalarni o‘rganishda deputatlar, mahalla raislari va “mahalla yettiligi” a’zolarining o‘zaro hamkorligini aniq yo‘nalishlar asosida tashkil etish, muammolarni joyida o‘rganish va ularning ijrosi yuzasidan deputatlik nazoratini samarali olib borish bo‘yicha fikr almashildi.

Uchrashuv yakunida hududlarni rivojlantirish va aholi muammolarini hal etishda mahalliy Kengashlar hamda “mahalla yettiligi” o‘rtasidagi hamkorlikni yanada mustahkamlash, mavjud muammolarni o‘z vaqtida aniqlash va ularning amaliy yechimiga ko‘maklashish yuzasidan tegishli vazifalar belgilab olindi.