“Yashil makon” doirasida monitoring o‘tkazildi

O‘zbekiston Ekologik partiyasi Taxiatosh tumani partiya Kengashi hamda Xalq deputatlari Taxiatosh tumani Kengashi kotibiyati mudiri, O‘zbekiston Ekologik partiyasidan saylangan deputat Matniyazov Akbar Qadirovich hamkorligida Xalqlar do‘stligi MFY hududida “Yashil makon” umummilliy loyihasi doirasida ekilgan daraxt va ko‘chatlarning holati yuzasidan monitoring o‘tkazildi.

Monitoring davomida hududdagi yashil maydonlar, daraxt va ko‘chatlarning umumiy holati, ularni sug‘orish hamda parvarishlash ishlari o‘rganildi. O‘rganish natijalariga ko‘ra, hududdagi daraxtlarning holati yaxshi darajada ekani, ko‘chatlar muntazam ravishda suv bilan ta’minlanayotgani va parvarishlash ishlari yo‘lga qo‘yilgani kuzatildi. 🌳💧

Mazkur ishlar O‘zbekiston Respublikasi Prezidenti tashabbusi bilan amalga oshirilayotgan “Yashil makon” umummilliy loyihasining asosiy maqsadlari — yashil hududlarni kengaytirish, aholi uchun qulay ekologik muhit yaratish va daraxtlarni asrab-avaylashga xizmat qilmoqda.

Shuningdek, Prezidentimizning 2026-yil 21-sentabrdagi “Yashil makon” loyihasini yangi bosqichga olib chiqish bo‘yicha belgilangan vazifalarida daraxtlarni ekish bilan bir qatorda, ularning yashovchanligini ta’minlash, sug‘orish va kamida uch yil davomida parvarishlash, mahallalarda daraxtlar holatini muntazam kuzatib borish zarurligi alohida ta’kidlangan.

Avvalroq Prezident Farmoni bilan “Yashil makon” umummilliy loyihasi joriy etilib, aholi punktlarini ko‘kalamzorlashtirish, daraxt va butalarni muhofaza qilish hamda yashil hududlarni kengaytirish bo‘yicha tizimli vazifalar belgilangan edi.