Termiz shahrining me’moriy qiyofasini yanada ko‘rkamlashtirish, ko‘cha va mahallalarda obodonlik, tozalik va tartibni ta’minlash, shuningdek, aholi uchun qulay va zamonaviy infratuzilmani shakllantirish borasidagi ishlar mahalliy Kengash deputatlari tomonidan izchil nazorat qilib borilmoqda.

Xalq deputatlari Termiz shahar Kengashi kotibiyati mudiri, deputat A.Ashurov hamda Kengashning Mahalliy budjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasi raisi, ekspert guruhi rahbari A.Mustafakulov tomonidan shaharda amalga oshirilayotgan obodonlashtirish va ko‘kalamzorlashtirish ishlari joyiga chiqib o‘rganildi.

O‘rganish davomida quyidagi yo‘nalishlarga alohida e’tibor qaratildi:

Tozalik va sanitariya holati — markaziy va ichki ko‘chalar, piyodalar yo‘laklari, jamoat joylari hamda hududlarda obodonchilik ishlarining tashkil etilishi;

Ko‘kalamzorlashtirish ishlari — “Yashil makon” umummilliy loyihasi doirasida ekilgan daraxt va manzarali o‘simliklarning parvarishi, yashil hududlarni saqlash hamda sug‘orish tizimlarining holati;

Yo‘l va piyodalar infratuzilmasi — trotuarlarning holati, ta’mirlash va qayta tiklash ishlari hamda ko‘chalar ko‘rinishini yaxshilash choralari;

Hududlarning umumiy obodonligi — ko‘cha va mahallalardagi mavjud kamchiliklarni aniqlash, ularni bartaraf etish hamda amalga oshirilayotgan ishlarning sifatini ta’minlash masalalari ko‘rib chiqildi.

O‘rganish yakunlari bo‘yicha aniqlangan kamchiliklarni bartaraf etish, obodonlashtirish ishlarining sifatini oshirish, hududlarda tozalik va tartibni muntazam ta’minlash yuzasidan mas’ul tashkilot va xizmatlar vakillariga tegishli tavsiya va topshiriqlar berildi.

Deputatlik nazorati — hududlar obodligi, infratuzilma sifati va aholi uchun qulay shart-sharoitlarni ta’minlashning muhim omilidir.