Xalq deputatlari Marg‘ilon shahar Kengashi tomonidan shahar hududida ichki yo‘llarni saqlash, joriy va mukammal ta’mirlash hamda yo‘l infratuzilmasini rivojlantirish bo‘yicha 2026-yilga mo‘ljallangan dasturlar ijrosi ustidan deputatlik nazorati amalga oshirilmoqda.

O‘zbekiston Respublikasi Vazirlar Mahkamasining 2024-yil 11-oktyabrdagi 665-son qarori hamda Xalq deputatlari Marg‘ilon shahar Kengashining tegishli qarorlariga muvofiq, mazkur yo‘nalishda olib borilayotgan ishlarning holatini o‘rganish maqsadida Xalq deputatlari Marg‘ilon shahar Kengashi Kotibiyati tomonidan Marg‘ilon shahar hokimining qurilish,
to‘siqlarsiz muhit yaratish, kommunikatsiyalar,
kommunal xo‘jalik, ekologiya va ko‘kamzorlashtirish
masalalari bo‘yicha o‘rinbosariga rasmiy aloqa xati yuborildi.

Unda ichki yo‘llarni saqlash va ta’mirlash dasturining bugungi kundagi ijrosi yuzasidan batafsil ma’lumot taqdim etish so‘ralgan. Jumladan, amalga oshirilgan joriy va mukammal ta’mirlash ishlari, ta’mirlangan ko‘chalar hamda obyektlarning aniq manzillari, mazkur yo‘nalishga ajratilgan byudjet mablag‘larining o‘zlashtirilish holati, shuningdek, bajarilgan ishlar natijasida aholi uchun yaratilgan qulayliklar va erishilgan amaliy ko‘rsatkichlar yuzasidan xisobot taqdim etilishi nazarda tutilgan.

Mazkur ma’lumotlar deputatlik nazorati doirasida atroflicha tahlil qilinib, dastur ijrosining samaradorligi baholanadi. Zarurat tug‘ilganda aniqlangan kamchiliklarni bartaraf etish, mablag‘lardan maqsadli va oqilona foydalanishni ta’minlash hamda yo‘l infratuzilmasini yanada takomillashtirish yuzasidan tegishli tavsiya va takliflar ishlab chiqiladi.

Xalq deputatlari Marg‘ilon shahar Kengashi tomonidan hududlarni kompleks rivojlantirish, byudjet mablag‘larining maqsadli sarflanishi, ijro intizomini mustahkamlash hamda davlat dasturlari ijrosi ustidan samarali deputatlik nazoratini ta’minlash ustuvor yo‘nalishlardan biri hisoblanadi.

Yo‘l infratuzilmasini yaxshilash borasidagi ishlar ustidan jamoatchilik va deputatlik nazoratining kuchaytirilishi shahar aholisiga yanada qulay, xavfsiz va zamonaviy yashash muhitini yaratishga xizmat qiladi.