Xalq deputatlari Qo‘qon shahar Kengashi raisi va deputati Yu.To‘ychiyev tomonidan fuqarolar murojaati asosida navbatdagi deputatlik so‘rovi yuborildi.

Deputatning "Chorchinor" mahalla fuqarolar yig‘inida saylovchilar bilan o‘tkazgan uchrashuvi davomida Saxovat ko‘chasi 3-uyda yashovchi fuqaro F.Miraxmedova onkologik kasallikni davolash uchun bepul kimyoterapiya olish masalasida amaliy yordam so‘rab murojaat qildi.

Mazkur murojaat yuzasidan O‘zbekiston Respublikasining “Xalq deputatlari viloyat, tuman va shahar Kengashi deputatining maqomi to‘g‘risida”gi Qonuni talablariga muvofiq, Qo‘qon shahar hokimining birinchi o‘rinbosari O.Qurbonov nomiga deputatlik so‘rovi yuborildi.

Deputatlik so‘rovida fuqaro F.Miraxmedovani onkologik kasalligini davolash, bepul kimyoterapiya olishi uchun amaliy yordam ko‘rsatish, shuningdek, ushbu davolanishni amaldagi tartib asosida tashkil etish imkoniyatlari va ko‘riladigan choralar yuzasidan asoslantirilgan ma’lumot taqdim etish so‘ralgan.

Fuqarolarning sog‘lig‘ini muhofaza qilish, ularning qonuniy manfaatlarini ta’minlash hamda ijtimoiy himoyaga muhtoj shaxslarni qo‘llab-quvvatlash deputatlik faoliyatining ustuvor yo‘nalishlaridan biri hisoblanadi.

Mazkur masala deputat nazoratiga olingan bo‘lib, uning ijrosi yuzasidan amalga oshirilayotgan ishlar va natijalar haqida jamoatchilikka qo‘shimcha ma’lumotlar berib boriladi.

Xalq deputatlari Qo‘qon shahar Kengashi