Sessiyada shahar Kengashi deputatlari, tegishli davlat organlari va tashkilotlar rahbarlari, ommaviy axborot vositalari vakillari hamda shahar Kengashi huzuridagi ekspert maslahat guruhi va yoshlar maslahat guruhi a'zolari ishtirok etdilar. Sessiya ishiga Kengash raisi O.Axmatshayev raislik qildi.

Sessiya kun tartibiga saylov jarayonlarini tashkil etishga oid uchta masala kiritildi. Xususan, Xalq deputatlari Marg‘ilon shahar Kengashiga bo‘shab qolgan 5-Do‘stlik saylov okrugi bo‘yicha saylov uchastka komissiyalari a'zoligiga nomzodlarni tavsiya etish, mazkur saylovni moliyalashtirish hamda shahar saylov komissiyasi tarkibiga o‘zgartirish kiritish masalalari atroflicha ko‘rib chiqildi.

Kun tartibidagi birinchi masala yuzasidan xalq deputatlari Marg‘ilon shahar Kengashi kotibiyati mudiri A.Ermatov axborot berdi. Ta'kidlanganidek, O‘zbekiston Respublikasi Markaziy saylov komissiyasining 2026-yil 8-iyuldagi 1468-sonli qaroriga muvofiq, 5-Do‘stlik saylov okrugida bo‘shab qolgan deputatlik o‘rniga saylov o‘tkazilishi belgilangan. Shu munosabat bilan tegishli saylov uchastka komissiyalari a'zoligiga tavsiya etilayotgan nomzodlar deputatlar e'tiboriga havola qilindi.

Mazkur masala yuzasidan Kengashning Korrupsiyaga qarshi kurashish va xavfsizlik masalalari bo‘yicha doimiy komissiyasi xulosasini komissiya raisi X.Abdurahmonov oʻqib eshittirdi.
Deputatlar tomonidan bildirilgan fikr va mulohazalardan so‘ng qaror loyihasi ovozga qo‘yilib, bir ovozdan qabul qilindi.

Sessiyaning ikkinchi va uchinchi masalalari yuzasidan shahar saylov komissiyasi raisi A.Nurmatov axborot berdi. Unda bo‘shab qolgan deputatlik o‘rniga saylovni moliyaviy ta'minlash hamda shahar saylov komissiyasi tarkibini amaldagi qonunchilik talablariga muvofiqlashtirish yuzasidan takliflar bildirildi.

Shuningdek, Mahalliy budjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiya tomonidan mazkur masalalar yuzasidan berilgan xulosa komissiya raisi E.Yunusov tomonidan deputatlarga o‘qib eshittirildi. Muhokamalardan so‘ng har ikkala masala bo‘yicha ham tegishli qarorlar deputatlar tomonidan bir ovozdan tasdiqlandi.

Sessiya yakunida kun tartibiga kiritilgan barcha masalalar to‘liq ko‘rib chiqilgani qayd etilib, qabul qilingan qarorlar bo‘shab qolgan deputatlik o‘rniga saylovni amaldagi qonunchilik talablariga muvofiq, ochiq va shaffof tashkil etishga xizmat qilishi ta'kidlandi.