27-Kamolot saylov okrugidan xalq deputatlari Navoiy viloyati Kengashi deputati, O‘zbekiston Respublikasi Oliy Majlisi Senati aʼzosi, “NKMK” AJ Boshqaruvi raisi – Bosh direktori Quvondiq Sanaqulov Zarafshon shahridagi “A.Navoiy”, “Konchilar”, “Quruvchi”, “Oltin vodiy” va “O‘zbekiston” MFY vakillari, mahallalar yettiligi, hududdan saylangan shahar Kengashi deputatlari bilan uchrashdi.

Uchrashuv avvalida Q.Sanaqulovning o‘tgan yilda amalga oshirilgan ishlar yuzasidan hisoboti tinglandi. Shundan so‘ng, kun tartibida saylovchilar bilan ishlash, hududda tadbirkorlikni rivojlantirish, aholi bandligini taʼminlash, amalga oshirilayotgan drayver loyihalarning bajarilishi, jamoatchilik nazoratini kuchaytirish bo‘yicha vazifa va kelgusidagi rejalar muhokama etildi.

- Bizning beshta mahallamizda 9,2 mingdan ortiq oila istiqomat qiladi. Ularning aksariyat ishli, kombinat bo‘linmalarida ishlaydi. Viloyat va shahar Kengashlariga saylangan deputatlarning saylovchilar bilan uchrashuvlari muammolarni tezkor hal etishga xizmat qilmoqda. Bugungi uchrashuvda ham saylovchilar tomonidan ijtimoiy hayotni yaxshilashga taalluqli bir qator murojaatlar kelib tushdi. Aksariyati joyida hal etilib, ijrosi nazoratga olindi, - deydi “Konchilar” MFY raisi Dilnoza Suvonova.

Uchrashuvda shaharda amalga oshirilayotgan investitsion loyihalar taqdimoti bilan tanishtirildi. Bu loyihalarning amalga oshirilishi yangi ish o‘rinlarini yaratish bilan bir qatorda, aholi farovonligini taʼminlashda muhim ahamiyatga ega ekanligi alohida taʼkidlandi.

Uchrashuv davomida ishtirokchilar o‘zlarining taklif va fikr-mulohazalarini bildirishdi va qiziqtirgan savollariga javoblar oldi.