Bog‘chami yoki
xavf manbai? 17-MTMdagi ayanchli holat deputatlar nazoratida 

Xalq deputatlari tuman Kengashi deputatlari va ishchi guruhi tomonidan joylardagi maktabgacha
ta’lim tashkilotlarida bolajonlar uchun yaratilgan sharoitlarni o‘rganish davom
etmoqda. Ammo navbatdagi nazorat tadbiri davomida aniqlangan holatlar hech
kimni befarq qoldirmaydi. 

8-Oybek saylov
okrugidan saylangan deputat (O'zLiDeP deputatlik guruhi a’zosi), Kengash raisi
A. Ibragimov hamda Kengash kotibiyati bosh mutaxassisi L. Iskandarov tomonidan
tumandagi 17-sonli davlat maktabgacha ta’lim tashkiloti (MTM) ko‘zdan
kechirilganda, muassasadagi holati umuman talabga javob bermasligi aniqlandi. 

O‘rganish
davomida quyidagi jiddiy kamchiliklar qayd etildi: 

Oshxonadagi ahvol
achinarli: Taom tayyorlanish joyida tozalik qoidalariga mutlaqo amal
qilinmagan. 

Oshxonadan
chiqqan chiqindilar va qoldiqlar o‘z vaqtida tashib ketilmay, bog‘cha
hududining o‘zida yig‘ilib qolgan. 

Ariqlardagi
dimlangan suv va axlat: Muassasa ariqlarida to‘planib, sasib qolgan suv va
uyulib yotgan chiqindilar kishini seskantiradigan darajada ayanchli manzarani
yuzaga keltirgan. 

Ekologiya va
atrof-muhitga zarar: Bog‘chaning kir yuvish xonasidan
(prachkadan)
chiqayotgan kimyoviy vositalar bilan ifloslangan oqova suvlar
to‘g‘ridan-to‘g‘ri ochiq ariqqa oqizib qo‘yilgan. Bu esa atrof-muhitga va shu
hududda yurgan bolalar sog‘lig‘iga jiddiy xavf tug‘dirmoqda. 

Xo‘sh, bog‘cha
rahbariyati va mas’ullar qayoqqa qaramoqda? Muassasada nazorat va mas’uliyat
shu qadar tashlab qo‘yilganki, jajji bolajonlarimizning salomatligi
ochiqdan-ochiq xavf ostida qolmoqda. Bog‘cha — bu bolaning ikkinchi uyi, u
yerdagi tozalik esa eng birinchi navbatdagi talab bo‘lishi shart! 

Telegram(http://t.me/PiskentTumaniKotibiyati) Facebook(https://www.facebook.com/share/1B4wErcYvP/