Joriy yilning o'tgan davrida “Yaxshi niyat” mahallasida salmoqli ishlar amalga oshirildi. Jumladan, Ulug‘bek, "Mash’al", "Yangi hayot", Xamza, "Darxon" ko‘chalari aholisini qiynab kelayotgan ta’mirtalab yo‘llarga asfalt yotqizildi. 

Aholi xavfsizligi va salomatligini ta’minlash, yo‘l-transport hodisalarining oldini olish maqsadida tegishli tashkilot rahbarlari nomiga deputat so‘rovlari yuborildi. So‘rov natijalariga ko‘ra, tumandagi 24-umumta’lim maktabi hududiga kirish yo‘liga piyodalar o‘tish belgisi va piyodalar yo‘lagi chizildi. Endilikda piyodalar yo‘lagiga yaqinlashgan avtoulov tezlikni pasaytiradi, bolalar yo‘ldan xavfsiz o‘tishadi.

Fuqarolar murojaatlari va ularning yechimi bo‘yicha qator samarali ishlar amalga oshirildi. Jumladan, Xamza ko‘chasida yashovchi Tursunova Zuxra, Darxon ko‘chasida yashovchi Masaliyeva Roziyalardan kelib tushgan murojaatlar e’tibordan chetda qolmadi. Ularga tibbiy muolaja uchun yordam ko‘rsatildi.

Shuningdek, mahalla aholisini qiynab kelayotgan masalalardan biri bo‘lgan ichimlik suvi muammosi bartaraf etilib, 200 ta xonadon suv bilan ta’minlandi. Bundan tashqari, mahalla ko‘chalariga 15 ta yangi beton ustunlar o‘rnatildi.

Har murojaatchining masalasi chetda qolmay, ijobiy hal etish choralari ko‘rilmoqda.

Mahalladagi shijoatkor, faol yoshlar o‘rtasida sog‘lom turmush tarzini rivojlantirish va ularning bo‘sh vaqtlarini mazmunli o‘tkazish maqsadida turli sport tadbirlari, kitobxonlik kechalari tashkil etilmoqda.

✍️Xalq deputatlari Chinoz tumani Kengashi deputati, doimiy komissiya raisi Mavluda Saydaliyeva