Xalq deputatlari Ishtixon tuman Kengashi deputatlari tomonidan hududlarda jinoyatchilikka qarshi kurashish borasida amalga oshirilayotgan ishlar tizimli ravishda o‘rganilmoqda.

Mazkur o‘rganish ishlari tumanning "Azamat" mahallasida davom ettirildi. Unda tuman Kengashi deputati Shaxlo Mardanova tomonidan hududda jinoyatchilikning oldini olish, huquqbuzarliklar profilaktikasini kuchaytirish hamda fuqarolar xavfsizligini ta’minlash yuzasidan amalga oshirilayotgan chora-tadbirlar atroflicha tahlil qilindi.

O‘rganish jarayonida mahallada ijtimoiy-ma’naviy muhitni yanada sog‘lomlashtirish, yoshlar o‘rtasida huquqbuzarliklarning oldini olish, oilaviy nizolar va boshqa turdagi salbiy holatlarni barvaqt aniqlash hamda ularni bartaraf etish borasida olib borilayotgan ishlar muhokama etildi.

Shuningdek, mas’ul tashkilotlar hamda mahalla fuqarolar yig‘ini faollari bilan hamkorlikda hududda mavjud muammolar o‘rganilib, jinoyatchilikka sabab bo‘layotgan omillarni aniqlash hamda ularni bartaraf etish yuzasidan tegishli taklif va tavsiyalar ishlab chiqildi.

O‘rganishlar davomida aholi bilan ochiq muloqot o‘tkazilib, fuqarolarning murojaatlari, fikr va takliflari tinglandi. Ularning hududda xavfsiz muhitni ta’minlash, tinchlik-osoyishtalikni mustahkamlash hamda huquqbuzarliklarning oldini olish borasidagi takliflari alohida e’tiborga olindi.

Shu bilan birga, hududda jinoyatchilikni kamaytirish, ijtimoiy barqarorlikni mustahkamlash hamda fuqarolarning huquqiy madaniyatini yuksaltirishga qaratilgan ishlarni izchil davom ettirish muhimligi ta’kidlandi. Mazkur yo‘nalishdagi hamkorlikni yanada kuchaytirish orqali mahallalarda osoyishtalikni ta’minlash ustuvor vazifa ekanligi qayd etildi.