Xalq deputatlari Ishtixon tuman Kengashi deputati Aziz Rabbimov, mahalla faollari bilan birgalikda 55-umumta’lim maktabida bo‘lib, bitiruvchilar bilan suhbat qurdi.

Uchrashuvda bitiruvchi yoshlarni Prezidentimiz tomonidan yaratilgan shart-sharoitlar, imkoniyat va imtiyozlar bilan tanishtirishdi hamda oliy o‘quv yurtiga o‘qishga borish, ishga joylashish, tadbirkorlik va boshqa faoliyat turlari bilan shug‘ullanish borasida yo‘l-yo‘riq ko‘rsatdilar.

Muloqotda bugungi kunda yurtimizda olib borilayotgan keng ko‘lamli islohotlarning mazmun-mohiyati, mamlakatimizda yoshlarga yaratilayotgan keng imkoniyatlar to‘g‘risida batafsil to‘xtalib, bitiruvchilarning kelajakda ulkan va masʼuliyatli marralar kutayotgani, oldilariga aniq maqsad qo‘yib, bor kuch-g‘ayrati, bilim va salohiyati bilan harakat qilishlari kerakligi ta’kidlandi.

Bitiruvchi yoshlarni mahallalardagi yoshlar yetakchilari bilan mustahkam aloqada bo‘lishlarini, ularning telegram kanaliga a’zo bo‘lib, yoshlar bandligini ta’minlash, iqtidorini ro‘yobga chiqarish borasidagi taklif va yangiliklardan xabardor bo‘lib turishlarini aytib o‘tdi. Shuningdek, yoshlar bandligini ta’minlash, tadbirkorlik faoliyatiga ko‘mak berish uchun Yoshlar agentligi tomonidan ko‘rsatiladigan ko‘mak, subsidiya, yo‘llanma va imtiyozlar turlari bilan tanishtirdi.

Ochiq muloqot tarzida o‘tkazilgan uchrashuvda bitiruvchilarning ko‘plab savollariga javoblar berildi hamda yoshlarning kelajak orzulari xususidagi fikr-mulohazalari ham tinglandi.