Sessiya jumısın xalıq deputatları rayonlıq Keńesi baslıǵı, rayon hákimi B.Sultanov basqarıp bardı. Sessiyada tiykarınan rayondı sociallıq-ekonomikalıq jaqtan rawajlandırıw boyınsha 11 másele, Ózbekstan Respublikası Ministrler Kabinetiniń 2022-jıl 31-marttaǵı  “Hayal-qızlar mashqalaların úyreniw hám sistemalı tárizde sheshiw sistemasın jánede rawajlandırıw ilajları haqqında”ǵı qararına tiykar rayonında “Hayallar dápteri”niń 5-basqıshın shólkemlestiriw haqqında rayon hákiminiń orınbasarı, shańaraq hám hayal-qızlar bólimi baslıǵı D.Nurımbetovanıń bayanatı tıńlandı.

Sonday-aq, Qanlıkól rayonın jumıssızlıq hám korrupciyadan awlaq aymaqqa aylandırıw hámde sektor baslıqları tárepinen máhállelerde jumıslardı shólkemlestiriw is-ilajları haqqında rayon hákimi B.Sultanov bayanat jasadı.

Bunnan soń AK «Agro Bank» hám «Xalıq Bank»   rayonlıq filialları tárepinen xalıqqa jaratılıp berilip atırǵan imkaniyatlar, sonday-aq, olarda isbilermenlik kónlikpelerin payda etiw boyınsha alıp barılıp atırǵan jumıslar hám ondaǵı ushırasıp atırǵan mashqalalar boyınsha 2023-jıl 12 ayı dawamında ámelge asırılǵan jumısları haqqında esabatları tıńlandı.

Sessiyada Qanlıkól rayonın 2024-jıl dawamında  jumıssızlıqtan tıs aymaqqa aylandırıw baǵdarlaması sheńberinde alıp barılatuǵın ilajlar haqqındaǵı sheshimine ózgeris kiritiw máselessi deputatlar názerine usınıldı. Bunda usı jıl dawamında jámi 4356 jumıssız puqaralardıń bántligin támiynlew belgilengen.

Sessiyada rayon aymaǵındaǵı awıl xojalıǵına mólsherlengen jer maydanlarınan nátiyjeli paydalanıw maqsetinde zaxiradaǵı bos turǵan jer maydanlarınan awıl xojalıǵı kárxanaları yaki diyqan xojalıqların shólkemlestiriw ushın ashıq  elektron tańlawǵa shıǵarıw boyınsha E-AUKSIONǵa qoyılatuǵın lotlar haqqında bayanat jasaldı. Bunda rayon boyınsha 400 gektardan aslam awılxojalıǵına molsherlengen jer maydanların ajıratıw belgilengenligi atap ótildi.

Sessiyada rayonda jaylasqan Qaraqalpaqstan Respublikası Suw xojalıǵı ministrligi janındaǵı Qaraqalpaqstan nasos stanciyaları hám energetika basqarması balansındaǵı «Begjap» nasos stanciyasın sırt el investiciya qarjıları esabınan rekonstrukciya hám modernizaciyalaw etiw usınısı deputatlar tárepinen bir awızdan maqullandı.

Sessiya májilisinde bunnan basqada bir qatar máseleler deputatlar tárepinen dodalanıp tiyisli qararlar qabıl etildi.