Shu maqsadda, O‘zbekiston Respublikasi Oliy Majlisi Senati a’zosi D.Suvonova, Xalq deputatlari Termiz shahar Kengashi raisi D.Normuradova, Kengash kotibiyati mudiri A.Ashurov hamda Kengashning ekspert guruhi rahbari A.Mustafakulovlar Kengashning 25-"Kokildorota" saylov okrugi deputati M.Sidiqova okrugi hududidagi "Kokildorota" mahallasida joylashgan 7 gektar maydondagi yangi zamonaviy issiqxona majmuasi faoliyati bilan yaqindan tanishdilar.
Mas'ullar issiqxonada yaratilgan sharoitlar, energiya tejovchi texnologiyalar, tomchilatib sug‘orish tizimi hamda yetishtirilayotgan mahsulot turlari bilan atroflicha tanishdilar.
Issiqxonaning asosiy imkoniyatlari:
Yangi ish o‘rinlari: Mahalla fuqarolari, xususan, xotin-qizlar va yoshlar uchun doimiy va mavsumiy daromad manbai yaratilgan;
Oziq-ovqat xavfsizligi: Ichki bozorni sifatli va arzon qishloq xo‘jaligi mahsulotlari bilan uzluksiz ta’minlash;
Eksport salohiyati: Yetishtirilayotgan mahsulotlarni nafaqat mahalliy bozorga, balki xorijiy davlatlarga eksport qilish imkoniyatlari.
Muloqot chog‘ida Senator D.Suvonova va Kengash raisi D.Normuradova zamonaviy issiqxona xo‘jaliklarining tuman va shahar iqtisodiyotidagi o‘rnini alohida e’tirof etdilar:
"7 gektar maydonda bunday zamonaviy va ixcham issiqxona majmuasining barpo etilishi — Termiz shahrining agro-sanoat salohiyatini oshirishga qo‘shilgan katta hissadir. Eng muhimi, bu yerda mahallamiz aholisi bandligi ta’minlanib, ularning turmush farovonligi oshmoqda. Bunday ilg‘or loyihalarni doimiy qo‘llab-quvvatlashimiz zarur," — deya ta’kidlandi uchrashuvda.
Uchrashuv yakunida issiqxona faoliyatini yanada kengaytirish, eksport geografiyasini oshirish hamda tadbirkorga zaruriy infratuzilma bo‘yicha deputatlik va Senat nazorati doirasida amaliy yordam berish masalalari belgilab olindi.