Xalq deputatlari Bo‘stonliq tumani Kengashining 2026-yilga mo‘ljallangan ish rejasiga muvofiq O‘zbekiston “Adolat” sotsial-demokratik partiyasidan saylangan deputat M.Ashurov tomonidan tumanning “Chinor” mahallasida fuqarolarning sayyor qabuli o‘tkazildi.

Qabulda mahalla fuqarolari tomonidan ichimlik suvi va elektr ta’minoti, ichki yo‘llarni ta’mirlash, kommunal xizmatlar sifatini yaxshilash, qattiq maishiy chiqindilarni o‘z vaqtida olib chiqish, yer va kadastr masalalari hamda boshqa ijtimoiy-iqtisodiy yo‘nalishlardagi bir qator murojaatlar bildirildi.

Deputat har bir murojaatni alohida tinglab, ularning mazmun-mohiyatini atroflicha o‘rgandi. Qabulda ishtirok etgan tegishli tashkilot va idoralar mas’ullari ishtirokida murojaatlarni joyida hal etish imkoniyatlari muhokama qilindi. Ayrim masalalar bo‘yicha huquqiy tushuntirishlar berilgan bo‘lsa, qo‘shimcha o‘rganish va moliyaviy mablag‘ talab etadigan murojaatlar ijrosini ta’minlash uchun mutasaddi tashkilotlarga yuborilishi belgilandi.