Xalq deputatlari Bo‘stonliq tumani Kengashining 2026-yilga mo‘ljallangan Ish rejasiga muvofiq Kengash raisi O.Babayev hamda kotibiyat mudiri J.Sadirov tomonlaridan tuman maktabgacha va maktab ta’limi bo‘limi boshlig‘i I.Izzatulloyev hamkorligida tumanning “Do‘stlik” mahallasida joylashgan sobiq 3-sonli maktabgacha ta’lim tashkiloti binolari va hududi holati o‘rganildi.

O‘rganish davomida ma’lum bo‘lishicha, mazkur bino bir necha yillar avval maktabgacha ta’lim tashkiloti sifatida faoliyat yuritgan bo‘lib, keyinchalik “Barkamol avlod” bolalar markazi ixtiyoriga o‘tkazilgan. Hozirgi vaqtda esa ushbu binoda hech qanday faoliyat olib borilmayotgani sababli obyektdan to‘liq foydalanilmayapti.

Deputatlar tomonidan binolarning texnik holati, ichki xonalar, muhandislik tarmoqlari hamda hudud infratuzilmasi atroflicha ko‘zdan kechirildi. O‘rganish natijalariga ko‘ra, binolarning texnik holati qoniqarli ekani, asosiy xonalar ta’mirlangani, binodan samarali foydalanish uchun zarur imkoniyatlar mavjudligi qayd etildi. Shuningdek, muassasa hududi kengligi, bolalarning sayr qilishi va o‘yin maydonchalarini tashkil etish uchun yetarli maydon mavjudligi ham alohida e’tirof etildi.

Shu bilan birga, mazkur obyektni yana maktabgacha ta’lim tashkiloti sifatida ishga tushirish uchun amaldagi sanitariya-gigiyena, yong‘in xavfsizligi va maktabgacha ta’lim muassasalariga qo‘yilgan zamonaviy talablarga muvofiq qo‘shimcha moslashtirish ishlarini amalga oshirish zarurligi ta’kidlandi. Xususan, bolalar uchun mo‘ljallangan sanitariya xonalarini jihozlash, oshxona va tibbiyot xonasini talab darajasida tayyorlash, bolalar maydonchalari hamda xavfsizlik infratuzilmasini barpo etish lozimligi qayd etildi.

O‘rganish yakunida mutasaddi tashkilotlar bilan hamkorlikda binodan samarali foydalanish, uni maktabgacha ta’lim tashkilotiga moslashtirish bo‘yicha texnik-iqtisodiy hisob-kitoblarni tayyorlash va tegishli takliflarni yuqori tashkilotlarga kiritish yuzasidan amaliy choralar ko‘rish lozimligi belgilandi. Mazkur masala deputatlar tomonidan doimiy nazoratga olinishi ma’lum qilindi.