Xalıq deputatları Bozataw rayonlıq Keńesi 6-sanlı «Andijan» saylaw okruginen (XDP) saylanǵan deputat Sh.Berdaxov tárepinen rayonımızdaǵı nuranıylar hám kóshe
biyleri menen ushırasıw ótkerildi. Ushırasıw dawamında aymaqta ámelge asırılıp atırǵan isler, xalıqtı qızıqtırǵan máseleler, sonıń ishinde infrastruktura, abadanlastırıw, xalıqqa kórsetilip atırǵan xızmetlerdiń sapasın jaqsılaw máseleleri keńnen sóz etildi. 

Nuranıylar hám kóshe biyleri tárepinen bildirilgen pikir-usınıslar tıńlanıp, olardıń orınlanıwın támiyinlew boyınsha tiyisli usınıslar islep shıǵıw belgilep alındı. Sonday-aq, jas áwladtı tárbiyalawda ulıwma jámiyetshiliktiń ornı haqqında da pikir almasıw bolıp ótti. 

Deputat Sh.Berdaxov óz gezeginde bildirgen múrájaatlar hám usınıslardı deputatlıq baqılawına alıp, olardıń sheshimin támiyinlew boyınsha tiyisli shólkemler menen birgelikte jumıs alıp barılatuǵının atap ótti.