Xalq deputatlari Qo‘qon shahar Kengashining navbatdagi sessiyasi kun tartibiga kiritilgan “Dolzarb 90 kunlik” dasturini tasdiqlash to‘g‘risidagi masala yuzasidan shahar Kengashi deputati M.Axmedova tomonidan Qo‘qon shahar 18-umumta’lim maktabida tashkil etilgan “Nurli kelajak” yozgi sog‘lomlashtirish oromgohi faoliyati o‘rganildi.

O‘rganish davomida o‘quvchilarning yozgi ta’til davrini mazmunli tashkil etish, ularning sog‘lig‘ini mustahkamlash, bo‘sh vaqtlarini samarali o‘tkazish hamda ijodiy va intellektual salohiyatlarini rivojlantirish borasida amalga oshirilayotgan ishlar bilan yaqindan tanishildi.

Oromgoh faoliyati davomida o‘quvchilar uchun turli madaniy-ma’rifiy, sport-sog‘lomlashtirish va ko‘ngilochar tadbirlar tashkil etilgan. Jumladan, kitobxonlik soatlari, rasmlar tanlovi, sport musobaqalari, “Zakovat” intellektual o‘yinlari, she’rxonlik, qo‘shiqchilik, sahna ko‘rinishlari hamda turli tanlovlar o‘tkazildi.

Shuningdek, “Turon” maktab teatr jamoasining chiqishlari, milliy qadriyatlar va vatanparvarlik mavzulariga bag‘ishlangan davra suhbatlari bolalarda milliy g‘urur va Vatanga muhabbat tuyg‘ularini yanada mustahkamlashga xizmat qilmoqda.

Oromgohda tashkil etilgan to‘garaklar ham o‘quvchilarning katta qiziqishiga sabab bo‘lmoqda. Xususan, IT va kitobxonlik yo‘nalishlaridagi mashg‘ulotlarda bolalar faol qatnashib, o‘z bilim va ko‘nikmalarini oshirmoqdalar. Rus tili to‘garagining Xasanova Zilola tomonidan olib borilishi esa o‘quvchilarning alohida e’tiborini tortmoqda.

O‘rganish yakunida “Nurli kelajak” yozgi sog‘lomlashtirish oromgohi o‘quvchilarning yozgi ta’tilini mazmunli tashkil etish, ularning ijodiy va intellektual salohiyatini rivojlantirish hamda sog‘lom hordiq chiqarishlari uchun barcha zarur sharoitlar yaratilganligi qayd etildi.

Xalq deputatlari Qo‘qon shahar Kengashi