IJTIMOIY HIMOYA, TIBBIY XIZMAT VA TADBIRKORLIK YO‘NALISHIDAGI ISHLAR O‘RGANILDI

O‘zbekiston Respublikasi Oliy Majlisi Qonunchilik palatasi deputati M.Salimova,
xalq deputatlari Quva tuman Kengashi kotibiyati mudiri R.Nodirov hamda
kotibiyat bosh mutaxassisi M.To‘xtasinov tomonidan tumanda aholini ijtimoiy
qo‘llab-quvvatlash, tibbiy xizmatlar sifatini oshirish va tadbirkorlikni
rivojlantirish borasida amalga oshirilayotgan ishlar joyiga chiqqan holda
o‘rganildi.

O‘rganishlar davomida O‘zbekiston Respublikasi Prezidentining 2026-yil 5-
fevraldagi PQ–49-son qarori ijrosi doirasida Bo‘ston va Sanoatchilar mahalla
fuqarolar yig‘inlarida istiqomat qiluvchi I guruh nogironi bo‘lgan
fuqarolarning yashash sharoitlari hamda ularni qo‘llab-quvvatlash bo‘yicha olib
borilayotgan ishlar bilan tanishildi.

Shuningdek, tumandagi 13 va 14-son oilaviy poliklinikalarda aholiga
ko‘rsatilayotgan tibbiy xizmatlar sifati, mavjud shart-sharoitlar, tibbiyot
xodimlari faoliyati va profilaktik tadbirlarni tashkil etish holati o‘rganildi.
Mas’ullarga tibbiy xizmat sifatini yanada yaxshilash, aholi murojaatlariga
tezkor munosabat bildirish hamda birlamchi tibbiy yordam qamrovini kengaytirish
bo‘yicha tavsiyalar berildi.

Shuningdek, deputatlar tomonidan Turk mahallasi hududida joylashgan
meva-sabzavot mahsulotlarini saralash, qadoqlash va eksport qilishga
ixtisoslashgan “Karim A Eksport” MChJ faoliyati ham o‘rganildi. Korxonada
mahsulotlarni qayta ishlash jarayonlari, yaratilgan ish o‘rinlari va aholi
bandligini ta’minlash borasida amalga oshirilayotgan ishlar tahlil qilindi.

Muloqotlar davomida korxona faoliyatini kengaytirish, eksport salohiyatini
oshirish, yangi ish o‘rinlari yaratish va mahalliy aholi bandligini ta’minlash
masalalari muhokama qilinib, tegishli taklif va tavsiyalar bildirildi.