Nogironligi bo‘lgan shaxslarni reabilitatsiya qilish va protezlash markazi faoliyati o‘rganildi

Xalq deputatlari Navoiy shahar Kengashi kotibiyat mudiri Jo‘rabek Hafizov hamda O‘zbekiston “Milliy tiklanish” demokratik partiyasi a’zolari bilan hamkorlikda Nogironligi bo‘lgan shaxslarni reabilitatsiya qilish va protezlash markazi faoliyati o‘rganildi.

O‘rganish jarayonida markazda nogironligi bo‘lgan fuqarolarga yaratilgan shart-sharoitlar, reabilitatsiya xizmatlarining tashkil etilishi, protez-ortopediya vositalari bilan ta’minlash jarayonlari hamda tibbiy-ijtimoiy xizmatlar sifati atroflicha ko‘zdan kechirildi.

Shuningdek, mutaxassislar tomonidan bemorlarga ko‘rsatilayotgan xizmatlar samaradorligi, zamonaviy reabilitatsiya usullarining qo‘llanilishi va fuqarolarning hayot sifatini yaxshilashga qaratilgan ishlar yuzasidan ma’lumotlar tinglandi. Jarayon davomida mavjud muammolar va ularni bartaraf etish bo‘yicha takliflar ham muhokama qilindi.

O‘rganish yakunida nogironligi bo‘lgan shaxslarni ijtimoiy qo‘llab-quvvatlash, ularni jamiyatga integratsiya qilish hamda ko‘rsatilayotgan xizmatlar sifatini yanada oshirish yuzasidan tegishli tavsiya va takliflar berildi.

Mazkur o‘rganish nogironligi bo‘lgan fuqarolarni qo‘llab-quvvatlash tizimini yanada takomillashtirish hamda ular uchun yaratilayotgan imkoniyatlarni kengaytirishga xizmat qiladi.