Xalq deputatlari Chilonzor tumani Kengashi deputati Imamov Sanjarali Tolkinovich tomonidan Chilonzor tumani hokimining qurilish, to‘siqsiz muhit yaratish, kommunikatsiyalarni rivojlantirish, ekologiya va ko‘kalamzorlashtirish masalalari bo‘yicha o‘rinbosari Kamol Qozimovich Xamrayevga deputat so‘rovi yuborildi.

Deputat so‘roviga Chilonzor tumanidagi “Tirsakobod” va “Beshqo‘rg‘on” mahalla fuqarolar yig‘inlari aholisidan kelib tushgan murojaatlar asos bo‘lgan.

Murojaatlarda Toshkent–Samarqand yo‘nalishida harakatlanuvchi “Afrosiyob” yuqori tezlikdagi poyezdi yo‘li kesishmalarida barpo etilgan yangi piyodalar o‘tish joylaridan foydalanishda qator muammolar mavjudligi qayd etilgan.

Xususan:

🔹 nogironligi bo‘lgan shaxslar uchun zarur sharoitlar yetarli darajada yaratilmagan;

🔹 yoshi ulug‘ fuqarolarning o‘tish joylaridan foydalanishi qiyinlashgan;

🔹 bolalar aravachasi bilan harakatlanuvchi ota-onalar uchun qulayliklar yetishmaydi;

🔹 harakatlanishi cheklangan fuqarolar uchun zamonaviy panduslar va ko‘tarish moslamalari (lift yoki maxsus platformalar) mavjud emas yoki yetarli darajada jihozlanmagan;

🔹 amaldagi holat ayrim hollarda fuqarolar xavfsizligiga salbiy ta’sir ko‘rsatmoqda.

Deputat so‘rovida mazkur piyodalar o‘tish joylarining texnik holatini o‘rganish, ularning amaldagi qurilish me’yorlari, shaharsozlik talablari hamda inklyuziv muhit standartlariga muvofiqligini tahlil qilish zarurligi alohida ta’kidlangan.

Shuningdek, o‘rganish natijalari asosida nogironligi bo‘lgan shaxslar, keksalar, bolalar aravachasi bilan harakatlanuvchi ota-onalar hamda boshqa harakatlanishi cheklangan fuqarolarning erkin va xavfsiz harakatlanishini ta’minlash maqsadida piyodalar o‘tish joylarini zamonaviy infratuzilma vositalari bilan jihozlash yuzasidan tegishli choralar ko‘rish so‘ralgan.


Fuqarolar uchun qulay, xavfsiz va to‘siqsiz muhit yaratish, ayniqsa aholining ijtimoiy himoyaga muhtoj qatlamlari manfaatlarini ta’minlash mahalliy Kengash deputatlarining doimiy e’tiboridagi ustuvor masalalardan biri bo‘lib qolmoqda.