Unda deputatlar M.Nurmuxamedova, D.Qodirova, M.Hasanova, M.Halimov hamda tuman Kengashi kotibiyati bosh mutaxassisi Sh.Ismatov ishtirok etdi.

Oʻrganish davomida tuman tibbiyot birlashmasida bolalar onkologik kasalliklarini erta aniqlash, davolash va dispanser nazoratiga olish borasida amalga oshirilayotgan ishlar tahlil qilindi.

Taʼkidlanganidek, Oʻzbekiston Respublikasi Prezidentining 2025-yil 19-maydagi “2025–2030-yillarda bolalar saratoniga qarshi kurashish boʻyicha Oʻzbekiston Respublikasi milliy strategiyasini amalga oshirish chora-tadbirlari toʻgʻrisida”gi PQ–186-son qarori ushbu yoʻnalishdagi ishlar samaradorligini yangi bosqichga olib chiqishga xizmat qilmoqda.

2026-yil I chorak holatiga koʻra, tumanda 0–18 yoshdagi 13 nafar bola tuman onkologi xonasida dispanser nazoratida turibdi. Joriy davr davomida 1 nafar bola onkologik kasallik bilan yangidan roʻyxatga olingan. Barcha bemor bolalar Buxoro viloyati onkologiya dispanserida bepul tibbiy koʻrikdan oʻtkazilib, yakuniy xulosalarga asosan dispanser nazoratiga olingan.

Shuningdek, I chorak davomida:

— oʻtkir limfoblast leykozi bilan 4 nafar;

— buyrak xavfli oʻsmasi bilan 1 nafar;

— bosh miya xavfli oʻsmasi bilan 4 nafar;

— osteosarkoma bilan 2 nafar;

— Nexojkin limfomasi bilan 1 nafar;

— yumshoq toʻqima xavfli oʻsmasi bilan 1 nafar bemor bolalar viloyat markazlarida statsionar sharoitda davolangan.

Bundan tashqari, tumandagi 3–18 yoshli bolalarga sifatli tibbiy xizmat koʻrsatish, goʻdaklar oʻlimini kamaytirish, bolalarni yuqumli va parazitar kasalliklarga qarshi profilaktik emlash tadbirlarini kuchaytirish maqsadida ota-onalar, maktabgacha hamda maktab taʼlim muassasalari oʻrtasida muntazam sanitariya-targʻibot ishlari olib borilayotgani qayd etildi.

Oʻrganish yakunida masala yuzasidan tegishli taklif va tavsiyalar ishlab chiqilib, xalq deputatlari tuman Kengashining navbatdagi sessiyasida muhokama etilishi belgilandi.